دنیا کی مقبول ترین میسیجنگ ایپلی کیشن واٹس ایپ کی مقبولیت کی ایک اہم وجہ یہ بھی ہے کہ یہ اپنے استعمال کنندگان کے لیے تواترکے ساتھ نت نئے فیچرزاورسیکیورٹی اپ ڈیٹس جاری کرتی رہتی ہے۔

واٹس ایپ میں آنے والی تبدیلیوں پرنظررکھنے والی ویب سائٹ وے بی ٹا انفوکے مطابق واٹس ایپ نے گروپ ایڈمنزکومزید با اختیاربنانے کے لیے ایک نیا فیچرپیش کردیا ہے۔

یہ بھی پڑھیں: واٹس ایپ کی اینڈروئیڈ صارفین کے لیے وائس نوٹ میں اہم تبدیلیاں

جس کی بدولت اب ایڈمنزکسی بھی ناپسندیدہ تصویر، ویڈیو، آڈیواورپیغام کوڈیلیٹ کرنے کے اہل ہوجائیں گے۔

واٹس ایپ نے اس فیچرکو فی الحال اینڈروئیڈ بی ٹا ٹیسٹرکے لیے جاری کیا ہے۔ تاہم، اگلے مرحلے میں اسے تمام صارفین کے لیے جاری کردیا جائے گا۔

اس بابت واٹس ایپ کا کہنا ہے کہ گروپ کوزیادہ بہترطریقے سے چلانے کے لیے ایڈمنزکو بااختیاربنانا ضروری تھا، کیوں کہ اس وقت گروپ ایڈمنزکے لیے فضول اورغیرضروری اور غیرمتعلقہ پیغامات کوروکنا درد سرہے۔

اس صورت میں ایڈمن کے صرف ایک ہی آپشن بچتا ہے کہ وہ گروپ سیٹنگ میں پیغامات بھیجنے کی سہولت صرف ’ ایڈمن اونلی‘ تک محدود کردیں، لیکن اس میں دوطرفہ ابلاغ نہیں ہوپاتا اوربعض اوقات گروپ کا مقصد ہی ختم ہوجاتا ہے۔

وے بی ٹا انفو کے مطابق گروپ ایڈمن کی جانب سے حذف ( ڈیلیٹ) کیے جانے والے پیغام کا گروپ میں شامل سارے ارکان کو پتا چل جائے گا ۔

واٹس ایپ کی جانب سے اس فیچر کی تیاری پرگزشتہ ایک سال سے کام کیا جارہا تھا اورامید ہے کہ اسے آئندہ آنے والی اپ ڈیٹ میں تمام استعمال کنندگان کے لیے جاری کردیا جائے گا۔

جب کہ ابھی تک اس بارے میں بھی کوئی تٖفصیلات فراہم نہیں کی گئی ہیں کہ آئی اوایس صارفین کے لیے اس اہم فیچرکوکب تک جاری کیا جائے گا۔

اس کے علاوہ واٹس ایپ ان ایپ اناؤسمنٹ کے فیچرپربھی کام کررہا ہے۔ ایک چیٹ بوٹ کی طرح کام کرنے والے اس فیچرمیں ایپلی کیشن کے اندرہی اناؤسمنٹ کی جاسکے گی۔ اس فیچرکوابھی اینڈروئیڈ بی ٹا صارفین کے لیے استعمال کیا جارہا ہے۔

تاہم، تمام استعمال کنندگان کے کے لیے اسے کب تک جاری کیا جائے گا، اس بابت کچھ نہیں بتایا گیا ہے۔