عدالت نے شہبازگل کے جسمانی ریمانڈ کی استدعا مسترد کرنے کے خلاف نظرثانی کی اپیل بھی مسترد کردی۔ 

(نورالامین دانش) تفصیلات کے مطابق ڈسٹرکٹ کورٹ اسلام آباد کے ایڈیشنل سیشن جج محمد عدنان خان نے پراسیکیوٹرکی اپیل مسترد کرتے ہوئے درخواست ناقابل سماعت قراردے دی۔

عدالت نے شہبازگل کےجسمانی ریمانڈ مسترد کرنے کے خلاف نظرثانی اپیل کے قابل سماعت ہونے یا نہ ہونے پرفیصلہ محفوظ کیا تھا۔

ڈسٹرکٹ اینڈ سیشن عدالت اسلام آباد میں شہبازگل کے جسمانی ریمانڈ مسترد کرنےکے خلاف نظرثانی اپیل پرسماعت ہوئی۔ ایڈیشنل سیشن جج عدنان خان نے نظرثانی اپیل پرسماعت کی جبکہ پراسیکیوٹر راناحسن عباس عدالت کے روبرو پیش ہوئے۔

پی ٹی آئی کے رہنما علی نوازاعوان اور ذلفی بخاری بھی کمرہ عدالت میں موجود تھے۔

پراسیکیوٹررانا حسن عباس نے عدالت سے استدعا کی کہ ایڈووکیٹ جنرل خود آرہے ہیں، سماعت میں وقفہ کیا جائے جس کے بعد عدالت نے سماعت میں آدھے گھنٹے کا وقفہ کیا۔

ڈسٹرکٹ پراسیکیوٹرنے کہا کہ جوڈیشل آرڈر ہے یا ایڈمنسٹریٹو آرڈرہے اس کو عدالت نے دیکھنا ہے۔ جس پرعدالت نے کہا کہ ایڈوکیٹ جنرل صاحب آپ کی پوزیشن نیوٹرل کی ہے۔

ایڈووکیٹ جنرل کی ڈسٹرکٹ پراسیکیوٹرکو روکنے کی کوشش کے دوران عدالت نے ایڈووکیٹ جنرل کو ڈسٹرکٹ پراسیکیوٹر کو دلائل دینے سے روکنے سے روک دیا۔

ڈسٹرکٹ پراسیکیوٹرنے نظرثانی اپیل قابل سماعت ہونے پردلائل کا آغازکیا جس میں انھوں نے نظرثانی اپیل قابل سماعت ہونے پرمختلف عدالتوں کے حوالے دیے۔

عدالت نے ڈسٹرکٹ پراسیکیوٹر کے دلائل سننے کے بعد رہنما تحریک انصاف شہبازگل کیس کا فیصلہ محفوظ کیا تھا۔