فلمی بینر یش راج فلمز کی ساری امیدیں شاہ رخ خان کی فلم ’پٹھان‘ سے وابستہ ہیں۔

غیر ملکی خبررساں ادارے کے مطابق یش راج فلمز  کے وہ دن اب گزر گئے جب شاہ رخ خان کا جادو یش راج فلمز کو ’ویر زارا‘، ’محبتیں‘ اور ’دل والے دلہنیا لے جائیں گے‘ جیسی فلموں کے ذریعے بھارتی باکس آفس پر سرِ فہرست رکھتا تھا۔

یاد رہے کہ رواں سال یش راج فلمز کے بینر تلے ریلیز  ہونے والی چاروں بڑی فلمیں باکس آفس پر ناکام رہیں اور بری طرح فلاپ ہوگئیں۔

یش راج فلمز نے اس سال رنویر سنگھ کی فلم’جئیش بھائی جوردار‘، رنبیر کپور اور سنجے دت کی فلم ’شمشیرا‘ سیف علی خان اور رانی مکھرجی کی فلم’بنٹی اور ببلی2‘ اور اکشے کمار کی فلم’سامرات پرتھوی راج‘ ریلیز کی ہے۔

آنجہانی پروڈیوسر کی موت کے  بعد ان کے بیٹے آدتیہ چوپڑا نے پروڈکشن ہاؤس کو سنبھالا ہے لیکن اُنہیں اپنے والد کی میراث کو برقرار رکھنے میں کافی دشواری کا سامنا کرنا پڑ رہا ہے۔

2012 میں یش چوپڑا کی موت  کے بعد سے اب تک اس فلمی بینر تلے ریلیز ہونے والی 29 فلموں میں سے 14 فلمیں باکس آفس پربری طرح فلاپ ہوئیں۔

اب دیکھنا یہ ہے کہ کیا ہمیشہ کی طرح اس بار بھی شاہ رخ خان کا جادو یش راج فلمز کے کام آئے گا یا نہیں۔

واضح رہے کہ شاہ رخ خان کی فلم ’پٹھان‘ اگلے سال 25 جنوری کو یش راج فلمز کے بینر تلے ریلیز ہونے والی ہے۔