وزیراعلیٰ خیبرپختونخوا کے معاون خصوصی اطلاعات بیرسٹر محمد علی سیف نے کہا ہے کہ پولیس شہداء کی قربانیاں ہمیشہ یاد رکھی جائیں گی۔

بیرسٹر محمد علی سیف نے یوم شہداء پولیس کے موقع پر پیغام دیتے ہوئے کہا کہ پولیس جوانوں اور افسران کی لازوال قربانیوں کو دل کی گہرائیوں سے خراج تحسین پیش کرتا ہوں۔

انہوں نے کہا کہ خیبر پختونخوا پولیس کا شمار بہترین فورسز میں ہوتا ہے، پولیس نے دہشت گردی کا ڈٹ کر مقابلہ اور اسے شکست دی۔

یہ بھی پڑھیں: وزیراعلیٰ پنجاب کا پولیس شہداء کی بیواؤں کی پینشن میں اضافے کا اعلان

وزیراعلیٰ خیبرپختونخوا کے معاون خصوصی کا کہنا ہے کہ خیبرپختونخوا پولیس نے امن اور عوام کی حفاظت کے لیے ہر اول دستے کا کردار ادا کیا ہے، صوبے کی تاریخ پولیس کے بہادر سپوتوں کی قربانیوں سے بھری پڑی ہے۔

بیرسٹر محمد علی سیف نے مزید کہا کہ پولیس شہداء کی قربانیاں ہمیشہ یاد رکھی جائیں گی، صوبائی حکومت پولیس شہداء کے اہلخانہ کے ساتھ کھڑی ہے۔

اس سے قبل یومِ شہدائے پولیس کے موقع پر پیغام دیتے ہوئے صدر مملکت ڈاکٹر عارف علوی نے کہا کہ  ملک کی داخلی سلامتی  کی خاطر اپنی جانوں کا نذرانہ پیش کرنے والے پاکستان پولیس کے بہادر جوانوں اور افسران  کو خراج عقیدت پیش کرتے ہیں۔

صدر مملکت نے کہا کہ پاکستان پولیس نے دہشت گردی  کے خلاف جنگ میں ہراول دستے کا کردار ادا کیا، فرض کی ادائیگی کے دوران پاکستان پولیس کے بےشمار جوانوں نے جام شہادت نوش کیا۔

  انہوں نے کہا کہ آج کے دن ہم پولیس کے تمام شہداء کو سلام پیش کرتے ہیں اور  اس عزم کا اظہار کرتے ہیں کہ قوم اپنے ان محسنوں کی لازوال  قربانیوں کو  ہمیشہ یاد رکھے گی۔