حافظ سعد رضوی نےکہا ہے کہ سیلاب متاثرین کی آبادکاری حکومتی توجہ کے بغیر ممکن نہیں۔

تفصیلات کے مطابق امیر تحریک لبیک پاکستان حافظ سعد حسین رضوی نے ملک میں سیلابی صورتحال پر اپنے ایک بیان میں کہا کہ حکومتی ایوانوں کے سوا ہر طرف آہو پکار ہے، سیلاب سے متاثرہ لاکھوں لوگ حکومتی امداد کے منتظر ہیں۔

انہوں نے کہا کہ حزب اقتدار اور حزب اختلاف قومی سانحات اور معاملات پر ایک پیج پر متفق ہوں، حکمران اگرکسی کا غم کم نہیں کر سکتے تو کم از کم اپنے چہروں کوہی دُکھی بنا لیں۔

امیر تحریک لبیک پاکستان کا کہنا تھا کہ پاکستان ہے تو ہم ہیں، سیاست اور کرسی کی لڑائی کیلئے بہت وقت پڑا ہے۔

حافظ سعد حسین رضوی کا یہ بھی کہنا تھا کہ سیلاب متاثرین کی آبادکاری حکومتی توجہ کے بغیر ممکن نہیں، مشکل وقت میں بھی سیاست دان حصولِ اقتدار کے لیے قوم کو تقسیم کرنے کی کوششیں کررہے ہیں۔

انہوں نے کہا کہ تکلیف کی گھڑی میں حکمرانوں کے رویوں میں سرد مہری کا رہنا نہ صرف سنگین المیہ بلکہ قومی و اخلاقی جرم بھی ہے۔

  سعد حسین رضوی نے یہ بھی کہا کہ جذبہ خدمت اور انسانی جانوں کے بچاؤ کے لیے ٹی ایل پی کے رضا کاروں نے جس مثالی کارکردگی کا مظاہرہ کیا وہ قابل تقلید ہے۔

امیر تحریک لبیک پاکستان حافظ سعد حسین رضوی نے مزید کہا کہ حکمرانوں کے لیے مفاد پرستی والی سفاک سیاست کیخلاف عوامی نفرت کے طوفان کو روکنا مشکل ہوجائے گا۔