جہانگیر ترین سیلاب متاثرین کی مدد کے لیے میدان میں آگئے، جہانگیر ترین نے سیلاب متاثرین کے لیے ایک کروڑ امداد کا اعلان کردیا ہے۔

تفصیلات کے مطابق جہانگیر ترین کا وزیراعلیٰ خیبر پختونخوا سے ٹیلی فونک رابطہ ہوا جس میں جہانگیر ترین نے خیبرپختونخوا میں سیلاب متاثرین کے لیے ایک کروڑ امداد کا اعلان کیا۔

اس موقع پر جہانگیر ترین نے کہا کہ مشکل کی اس گھڑی میں اپنے پاکستانیوں کو تنہا نہیں چھوڑوں گا،انشاءاللہ پاکستانی قوم اس مشکل سے کامیابی سے نبرد آزما ہوگی۔

ذرائع کے مطابق جہانگیر ترین کل جنوبی پنجاب اور سندھ میں سیلاب متاثرین کے لیے امداد کا اعلان کرینگے۔

وزیراعظم کا خیبر پختونخوا کے سیلاب سے متاثرہ اضلاع کا دورہ

دوسری جانب وزیراعظم شہباز شریف نے آج 29 اگست بروز پیر سیلاب زدگان سے اظہار یکجہتی کے لئے خیبر پختونخوا کے سیلاب سے متاثرہ اضلاع کا دورہ کیا۔

اس دوران وزیراعظم شہباز شریف چارسدہ اور نوشہرہ میں سیلاب سے ہونے والے نقصانات کا جائزہ لیا اور سیلاب متاثرین سے ملاقات بھی کیں۔

دورے کے دوران وزیرِ اعظم کو متعلقہ حکام کی جانب سے سیلاب سے ہونے والے نقصانات اور امدادی کارروائیوں پر بریفنگ بھی دی گئی۔

کے پی کے دریاؤں میں سیلابی صورتحال، نوشہرہ میں پانی گھروں اور کھیتوں میں داخل

شدید بارشوں کے باعث خیبرپختونخوا کے دریاؤں میں سیلابی صورتحال برقرار ہے جبکہ نوشہرہ کے کئی علاقوں میں سیلابی پانی گھروں اور کھیتوں میں داخل ہو گیا ہے۔

ڈی سی نوشہرہ کے مطابق سیلابی پانی پبی، محب بانڈہ میں پانی کھیتوں اور گھروں میں داخل ہوگیا ہے جبکہ بانڈہ شیخ اسماعیل، گھڑی مومن اور  جواد داودزئی کے علاقوں میں بھی سیلابی پانی داخل ہوگیا ہے۔

ڈپٹی کمشنر نوشہرہ کا کہنا تھا کہ سیلابی صورتحال کے باعث پہلے سے علاقوں کو خالی کرا لیا گیا تھا جس کے باعث صورتحال بہتر ہے، اب تک 30 ہزار افراد کو محفوظ مقامات پر منتقل کیا جا چکا ہے،کچھ متاثرین کیمپوں میں آئے اور بعض نے رشتے داروں کے ہاں قیام کیا۔

انہوں نے بتایا کہ متاثرہ اضلاع میں امدادی سرگرمیاں جاری ہیں، 100 امدادی کیمپ بھی قائم کیے گئے ہیں،ہر تحصیل میں 30 سے 35 کیمپ لگائے گئے ہیں، سیلاب متاثرین کو خوراک اور دیگر ضروری اشیاء فراہم کی جا رہی ہیں۔