منی لانڈرنگ کیس میں 7 ستمبر کو شہبازشریف اورحمزہ شہباز کو حاضری یقینی بنانے کا حکم دے دیا گیا۔ 

تفصیلات کے مطابق لاہوراسپیشل سینٹرل عدالت نے شہباز شریف کیخلاف منی لانڈرنگ کیس میں گزشتہ سماعت کا تحریری حکم جاری کرتے ہوئے حکم دیا کہ 7 ستمبر کو شہباز شریف، حمزہ شہباز سمیت دیگر ملزمان حاضری یقینی بنائیں۔

عدالت نے سلمان شہبازکی منقولہ و غیرمنقولہ جائیدادیں قرق کرنے کا حکم دے دیا۔

عدالت نے آئندہ سماعت پر اشتہاری ملزم سلمان شہباز اور طاہر نقوی کی جائیدادوں کی قرقی کی رپورٹ بھی طلب کر لی۔

عدالت نے مقصود چپڑاسی کی وفات کے سبب اس کے خلاف کیس کارروائی ختم کر دی، مقصود چپڑاسی کی وفات کا مصدقہ سرٹیفکیٹ عدالتی ریکارڈ کا حصہ بنا دیا گیا۔

عدالت نے سلمان شہباز کی چنیوٹ میں 200 کنال زرعی اراضی اورسلمان شہباز کے 13 کمپنیوں میں شئیرز اور 29 بینک اکاؤنٹس بھی قرق کرنے کا بھی  حکم دیا۔

عدالت نے اشتہاری ملزم طاہر نقوی کے ایک کمپنی میں 5000 شئیرز بھی قرق کرنے کا حکم دیا۔

تفتیشی افسر نے عدالت میں سلمان شہباز اور طاہر نقوی کی منقولہ و غیر منقولہ جائیدادوں کا ریکارڈ پیش کیا جس کے بعدعدالت نے تفتیشی افسر کو جاری کیا گیا اظہار وجوہ کا نوٹس آئندہ احتیاط کرنے کے انتباہ پر ختم کر دیا۔

تحریری حکم میں کہا گیا کہ تفتیشی افسرعلالت کی وجہ سے تاخیر سے عدالت میں پہنچا تھا۔  عدالت نے تفتیشی افسر کی غیر مشروط معافی اور آئندہ احتیاط کی یقین دہانی پر شوکاز نوٹس ختم کیا۔