لاہورجا کرپسند کی شادی کرنے والی لڑکی کے مبینہ اغوا کے مقدمے سے متعلق تفتیشی افسر کی میڈیکو لیگل معائنہ کی درخواست پر تحریری فیصلہ جاری کردیا گیا۔

تفصیلات کے مطابق سٹی کورٹ، جوڈیشل مجسٹریٹ شرقی کی عدالت نے تحریری فیصلے میں کہا کہ کیس کے تفتیشی افسر ڈی ایس پی سعید رند نے میڈیکولیگل معائنے کی درخواست دائر کی۔

ملزم ظہیر کے وکلا نے میڈیکولیگل معائنے کی مخالفت کی، فیصلے میں کہا گیا کہ ڈسٹرکٹ پبلک پراسیکیوٹر نے لڑکی کے ساتھ زیادتی کے خدشے کا اظہار کیا۔

پراسیکیوشن کے مطابق  لڑکی کو عدالت نے چائلڈ پروٹیکشن اتھارٹی کی تحویل میں دیا ہے۔  لڑکی کے معائنے کے لئے عدالتی اجازت ضروری ہے۔

مدعی کے وکیل نے مؤقف پیش  کیا کہ اس طرح کے معاملے میں میڈیکل کے لئے لڑکی کی اجازت کی ضرورت نہیں ہے۔ لڑکی کے نگران کی اجازت میڈیکولیگل معائنے کے لئے کافی ہے۔

مدعی کے وکیل نے مؤقف میں کہا کہ تفتیشی افسر کو میڈیکولیگل معائنے سے روکنا تفتیش میں رکاوٹ ہوگا۔ لڑکی کے والد معائنے کی اجازت دینے کو تیار ہیں۔ پراگریس رپورٹ میں واضح ہے کہ لڑکی کے ساتھ زیادتی ہوئی ہے۔

وکیل ملزم نے کہا کہ لڑکی کے میڈیکولیگل معائنے کی درخواست بدنیتی پرمبنی ہے۔ لڑکی نے اپنے کسی بیان میں زیادتی کا الزام نہیں لگایا ہے۔ اس مرحلے پرمیڈیکولیگل معائنے سے صرف لڑکی کو شرمندگی کا سامنا ہوگا۔

ملزم کے وکیل نے کہا کہ لڑکی نے پولیس اور مجسٹریٹ کو دیے گئے بیان میں کہا ہے کہ اس نے مرضی سے ظہیر سے شادی کی۔ لڑکی اور ظہیر کے درمیان نکاح کا معاہدہ موجود ہے جو فیملی کورٹ میں زیر سماعت ہے۔

عدالت نے تحریری حکم نامے میں کہا کہ عدالت لڑکی کے حقوق کی محافظ ہے۔ اس میں کوئی شک نہیں کہ ڈی این اے نمونے حصول میں تاخیر ہوچکی ہے۔ اس مرحلے پر میڈیکو لیگل معائنہ نا صرف لڑکی کے لئے باعث شرم بلکہ توہین آمیزہوگا۔ لڑکی کے مفاد میں تفتیشی افسر کی درخواست رد کی جاتی ہے۔

دوسری جانب لڑکی کے مبینہ اغوا کے کیس میں  جوڈیشل مجسٹریٹ شرقی نے میڈیا پر لڑکی کے نام اور تصویر نشر کرنے پر پابندی عائد کردی۔

عدالت نے حکم دیا کہ سوشل میڈیا پر بھی لڑکی سے متعلق مواد شائع کرنے پر پابندی ہوگی۔

عدالت نے خلاف ورزی کی صورت میں پیمرا اور پی ٹی اے کو کارروائی کا حکم دے دیا۔

ظہیر کے وکیل کی جانب سے لڑکی کے بیان قلم بند کرنے کی درخواست دائرکی گئی جس میں کہا گیا کہ عدالت کے روبرو لڑکی کا 164 کا بیان ریکارڈ کیا جائے۔