ملکہ الزبتھ دوم کی آخری رسومات کے باعث اس ہفتے کے آخر میں ہونے والے پریمیئر لیگ کے تین میچز ملتوی کر دیے گئے ہیں۔

برطانوی خبر رساں ادارے کے مطابق لیورپول کے ساتھ چیلسی کا ہوم گیم اور لیڈز یونائیٹڈ بمقابلہ مانچسٹر یونائیٹڈ میچ منسوخ کر دیا گیا ہے۔

جبکہ کرسٹل پیلس کے خلاف برائٹن کا میچ جو پہلے ہی ریل ہڑتالوں کی وجہ سے منسوخ کر دیا گیا تھا اسے بھی دوبارہ ملتوی کر دیا گیا تھا۔

برطانوی میڈیا کے مطابق 16 اور 18 ستمبر کے درمیان لیگ کے دوسرے میچ ملکہ کی موت کے بعد احترام کے نشان کے طور پر ملتوی کئے گئے ہیں۔

پریمیئر لیگ کی انتظامیہ نے اپنے ایک بیان میں کہا ہے کہ کلبوں، پولیس، مقامی حفاظتی مشاورتی گروپوں اور دیگر متعلقہ حکام کے ساتھ وسیع مشاورت کے بعد، تینوں میچوں کو ملتوی کرنے کے سوا کوئی چارہ نہیں تھا۔

لیگ ترجمان کے مطابق پریمیئر لیگ یوکے فٹ بال پولیسنگ یونٹ اور ملک بھر کی دیگر پولیس فورسز کے ساتھ ساتھ ہمارے براڈکاسٹ پارٹنرز کا اس عمل کے دوران تعاون کے لیے شکریہ ادا کرنا چاہے گی، اور ہفتہ کے اختتام  سے پہلے ان کے ساتھ رابطہ قائم رکھے گی۔

ترجمان کا مزید کہنا تھا کہ قومی سوگ کے دوران کھیلے جانے والے میچوں کے لئے، پریمیئر لیگ سٹیڈیمز میں ملکہ کو خراج تحسین پیش کیا جائے گا۔

پریمئیر لیگ کی انتظامیہ نے کہا ہے کہ ملتوی میچوں کی نئی تاریخوں کا اعلان بعد میں کیا جائے گا۔