پاکستان میں سیلاب متاثرین کی امداد کے لئے دوست اور برادر ممالک سے امداد کا سلسلہ جاری ہے۔

تفصیلات کے مطابق ترجمان دفتر خارجہ عاصم افتخار احمد نے اپنے ایک بیان میں کہا کہ پاکستانی سیلاب متاثرین کے لیے 16 ممالک اور 3 عالمی تنظیموں سے 129 امدادی طیارے پہنچ چکے ہیں۔

انہوں نے کہا کہ متحدہ عرب امارات نے سب سے زیادہ 41 امدادی طیارے راولپنڈی، کراچی، لاہور بھیجے جبکہ امریکہ نے سیلاب متاثرین کے لیے 21 امدادی طیارے سکھر، کراچی  اور راولپنڈی بھیجے۔

ان کا کہنا تھا کہ ترکیہ نے سیلاب متاثرین کے لیے 14 طیارے امداد کراچی، راولپنڈی بھیجے جبکہ چین اور قطر سے 4،4 امدادی طیارے پاکستان آئے۔

عاصم افتخار احمد نے کہا کہ عمان سے سیلاب متاثرین کے لیے امداد لے کر 8 طیارے پاکستان پہنچے جبکہ سعودی عرب سے متاثرین سیلاب کے لیے 9 امدادی طیارے پاکستان پہنچ چکے ہیں۔

ان کا کہنا تھا کہ ازبکستان، فرانس، ترکمانستان اور اردن سے امداد لے کر ایک ایک طیارہ پاکستان پہنچا جبکہ نیپال، برطانیہ، روس،  یونان اور اٹلی نے بھی ایک ایک امدادی طیارہ پاکستان بھیجا ہے۔

ان کا یہ بھی کہنا تھا کہ یونیسف نے 3، اقوام متحدہ ادارہ مہاجرین نے 13 اور عالمی ادارہ خوراک نے 3 امدادی طیارے بھیجے ہیں جبکہ ایران، ترکیہ، تاجکستان، عمان اور متحدہ عرب امارات نے بری، بحری راستے سے بھی امداد بھیجی ہے۔

عاصم افتخار احمد نے کہا کہ ایران ہلال احمر نے ٹرکوں کے ذریعے 100 ٹن امداد پاکستان ہلال احمر کو بھیجی۔

ترجمان دفتر خارجہ عاصم افتخار احمد نے مزید کہا کہ ترکیہ ہلال احمر نے امدادی سامان کے 2 ٹرک پاکستان بھیجے جبکہ ترکیہ حکومت 3 امدادی مال گاڑیاں بھی پاکستان بھیج چکی ہے۔