حافظ سعد رضوی نے کہا ہے کہ ملکی حالات دیکھ کر دلی طور پر دکھ ہوتا ہے۔

تفصیلات کے مطابق امیر تحریک لبیک پاکستان حافظ سعد حسین رضوی نے ملکی موجودہ صورتحال پر اپنے ایک بیان میں کہا کہ تحریک لبیک پاکستان کی خدمات کودیوار سے لگانے کے سلسلے کا خاتمہ کیا جائے، اسلام پاکستان اور عوام ہی ہمارا منشور ہے۔

انہوں نے کہا کہ موجودہ حالات سے مقابلہ کرنے کی مکمل صلاحیت رکھتے ہیں، جن لوگوں نے ملک کو معاشی تباہی کے دہانے پر پہنچایا اُن سے بہتری کی اُمید رکھنا خودکشی کے مترادف ہے۔

امیر تحریک لبیک پاکستان نے یہ بھی کہا کہ عوام بے بسی کی تصویر بنے ہوئے ہیں اور حکمران طعن و تشنیع میں مصروف ہیں۔

ان کا کہنا تھا کہ ہماری معاشی ٹیم ملکی معیشت کو بہتر کرنے کے فارمولے کیلئے دن رات کوشاں ہے، ایسی معاشی پالیسیاں دیں گے جو ملک و قوم کی حقیقی خوشحالی کا ذریعہ بنے گی۔

حافظ سعد حسین رضوی کا یہ بھی کہنا تھا کہ افسوس ہم کس دور میں جی رہے ہیں جس میں دجال کی ایک صفت عمران خان کی شکل میں ہمارے درمیان موجود ہے۔

امیر تحریک لبیک پاکستان حافظ سعد حسین رضوی کا مزید کہنا تھا کہ ملکی حالات دیکھ کر دلی طور پر دکھ ہوتا ہے،40 سالوں سے ملک کو لوٹنے والے آج پھر دعوے کرتے پھر رہے ہیں کہ وہ ملک کو ترقی کی راہ پر گامزن کرینگے۔