احتساب عدالت نے ملزمان کی ایل این جی ریفرنس ختم کرنے کی درخواست پر نیب کو نوٹس جاری کردیا۔

احتساب عدالت اسلام آباد میں ایل این جی ریفرنس کی سماعت ہوئی۔ احتساب عدالت کے جج اعظم خان نے ریفرنس کی سماعت کی۔

سابق وزیراعظم شاہد خاقان عباسی سمیت دیگر عدالت کے روبرو پیش ہوئے۔ شریکِ ملزمان کے وکلا نے کہا کہ نیب ترامیم کے بعد چیزیں واضح ہو چکی ہے۔ کیا نئے نیب قانون کے تحت کسی ملزم نے عدالت کو درخواست دی؟

 بیرسٹر قاسم عباسی نے جواب دیا کہ جی ہم درخواست دینے کو تیار ہیں۔ نیب قانون کے مطابق کابینہ، ای سی سی سمیت دیگر کمیٹیوں سے منظورشدہ منصوبے نیب کے دائرہ کار سے باہرہیں۔ عدالت سے درخواست ہے کہ یہ ریفرنس قابل سماعت نہیں۔

سماعت کے دوران نیب نے ایل این جی ریفرنس ختم کرنے کی مخالفت کرتے ہوئے کہا کہ ایل این جی کا ٹھیکہ دینے کی کابینہ سے منظوری نہیں لی گئی۔ ملزمان نے ایل این جی سے مالی فائدے بھی لیے۔ ایل این جی ریفرنس میں منی لانڈرنگ کی دفعات بھی شامل ہیں۔

احتساب عدالت نے ایل این جی ریفرنس کی سماعت چاراکتوبر تک ملتوی کرتے ہوئے ملزمان کی ایل این جی ریفرنس ختم کرنے کی درخواست پر نیب کو نوٹس جاری کردیا۔

آئندہ سماعت پر ایل این جی ریفرنس ختم کرنے یا نہ کرنے پر وکلا دلائل دیں گے۔

احتساب عدالت کے باہرشاہد خاقان عباسی نے میڈیا سے گفتگو میں کہا کہ نام نہاد احتساب کا عمل ہے جو گزشتہ کئی سالوں سے چل رہا ہے۔ میں نے بارہا کہا ہے کہ عدالتوں میں کیمرے لگائیں تاکہ پورے پاکستان کو پتا چلے۔

شاہد خاقان عباسی نے کہا کہ سابق چیئرمین نیب کی کارکردگی سب کے سامنے ہے گزشتہ چاربرسوں  سے کیسز بنائے گئے اور ناکام رہے۔ جاوید اقبال کو کہا کہ اپنی کرپشن سامنے لائیں لیکن میرے سوال کا جواب تک نہیں دیا گیا۔

سابق وزیراعظم نے کہا کہ پٹرول کی قیمت کے بارہ حصہ ہوتے ہیں جو کہ 10 حصہ انٹرنیشنل مارکیٹ سے منسلک ہوتے ہیں۔ عمران خان نے آئی ایم ایف سے معاہدے کیے تھے جس کی وجہ سے عوام کو بھگتنا پڑرہا ہے۔ عمران خان نے ملک کو اندھیروں کی دلدل میں دھکیلا۔

شاہد خاقان عباسی نے مذید کہا کہ مشکل فیصلے کرکے ہی ملک کو ترقی کی راہ پر گامزن کریں گے۔ الیکشن اپنے مقررہ وقت پر ہی ہوگا ،اپنا ٹنیور مکمل کرکے ہی الیکشن ہوگا۔