خواجہ سعد رفیق نے کہا ہے کہ ایئر پورٹ کا فیز ون مارچ 2023 میں مکمل ہوگا۔

تفصیلات کے مطابق وفاقی وزیر ہوا بازی خواجہ سعد رفیق نے مریدکے میں نئے تعمیر ہونے والے جنرل ایوی ایشن ایئر پورٹ کا دورہ کیا جہاں انہوں نے منصوبے پر کام کی رفتار کا جائزہ لیا۔

انہوں نے کہا کہ نئے جنرل ایوی ایشن ایئر پورٹ کا کام مقررہ مدت میں مکمل کیا جائے، مستقبل کی ضروریات کو مد نظر رکھ کر ایئر پورٹ کی تعمیر کا کام کیا جائے۔

ان کا کہنا تھا کہ مریدکے جنرل ایوی ایشن ائر پورٹ کی منصوبہ بندی لاہور کے متبادل ایئرپورٹ کے طور پر کی جائے۔

کنسلٹنٹ کو سود رفیق نے ہدایت دیتے ہوئے کہا کہ مریدکے میں نئے تعمیر ہونے والے ایئرپورٹ کی نکاسی آب کے لئے جامع پلان ترتیب نہیں دیا گیا اس کو فی الفور تشکیل دیا جائے۔

وفاقی وزیر ہوا بازی خواجہ سعد رفیق کا مزید کہنا تھا کہ نائٹ لینڈنگ سسٹم فیز ون میں کیا جائے جبکہ ایئر پورٹ کا فیز ون مارچ 2023 میں مکمل ہوگا۔

واضح رہے گزشتہ روز خواجہ سعد رفیق کی زیرِ صدارت اجلاس ہوا تھا جس میں انہیں ریلوے ڈرائی پورٹس کی کارکردگی پر بریفنگ دی گئی تھی۔

اجلاس کی صدارت کرتے ہوئے وفاقی وزیر ریلوے خواجہ سعد رفیق نے کہا تھا کہ تجارت کو فروغ دینے اور ریونیو بڑھانے کیلیے تمام پورٹس کی ایویلیوایشن رپورٹ وزارت میں بھجوائی جائے۔

انہوں نے کہا تھا کہ کوئٹہ زاہدان سیکشن کا ٹرن اراؤنڈ ٹائم کم کرنے، سیکشن کا تفصیلی سروے کرنے اور ٹریک کو مزید فٹ کرنے کے لیے فنڈز مختص کیے جائیں۔

ان کا یہ بھی کہنا تھا کہ کوئٹہ زاہدان فریٹ آپریشن کے لیے ڈیڈیکیشن ٹیم مقرر کی جائے اور سبی ہرنائی سیکشن پر سیلابی نقصانات کی ریپیئر اور نامکمل سیکشن کی جلد از جلد تکمیل کی جائے گی۔

وفاقی وزیر ریلوے خواجہ سعد رفیق کا مزید کہنا تھا کہ عوامی سہولت کیلیے، چین سے نئی کوچز کو مقررہ وقت سے پہلے منگوانے کی درخواست بھی کی جائے گی۔