سندھ ہائی کورٹ نے بول نیوز اور انٹرٹینمنٹ چینل کی نشریات بندش کے خلاف  حکم نامہ جاری کردیا۔ 

تفصیلات کے مطابق سندھ ہائی کورٹ نے بول نیٹ ورک کے وکیل بیرسٹرعابد زبیری اور ایان میمن کے دلائل سننے کے بعد فیصلہ محفوظ کیا تھا۔

سندھ ہائی کورٹ نے حکم نامے میں کہا کہ بول نیوز اور انٹرٹینمنٹ کی نشریات فوری بحال کرکی جائیں۔

عدالت نے بول نیوز کی نشریات فوری طورپر پرانی پوزیشن پر بحال کرنے کا حکم دیتے ہوئے پیمرا کی 5 ستمبر کی پریس ریلیز اور فیصلہ معطل کردیا۔

سندھ ہائی کورٹ نے پیمرا اور وفاقی حکومت کو نوٹس جاری کرتے ہوئے پیمرا اور دیگر فریقین سے 14 ستمبر کو جواب طلب کرلیا۔

سندھ ہائیکورٹ کے جسٹس ندیم اختر نے فیصلہ سنایا۔

سندھ ہائی کورٹ میں بول نیوزاوربول انٹرٹینمنٹ کی پیمرا کی جانب سے بندش کے معاملے پرمیسرزلبیک پرائیویٹ لمیٹڈ نے چینلز کی بندش کے خلاف سندھ ہائی کورٹ سے رجوع کیا۔

جسٹس ندیم اخترنے بول نیوز کے وکیل بیرسٹرعابد زبیری اور ایان میمن کے دلائل سننے کے بعد فیصلہ محفوظ کیا  اور کہا کہ درخواست پر فیصلہ آج ہی سنایا جائے گا۔

 سماعت کے آغاز میں عابد زبیری ایڈووکیٹ بول نیٹ ورک نے دلائل دیے کہ پیمرا نے چیئرمین سلیم بیگ کی زیر صدارت اجلاس میں بول نیوز اور بول انٹرٹینمنٹ کا لائسنس معطل کردیا، پیمرا کی جانب سے بول انتظامیہ کو سنا ہی نہیں گیا اور یک طرفہ فیصلہ جاری کیا گیا۔