رانا ثنااللہ کے خلاف منشیات کیس میں مزید بحث کے لیے کارروائی 15 اکتوبرتک ملتوی کر دی گئی۔ 

تفصیلات کے مطابق لاہور میں انسداد منشیات عدالت میں وفاقی وزیرداخلہ رانا ثنااللہ کے خلاف منشیات کیس کی سماعت ہوئی۔

وفاقی وزیرداخلہ رانا ثنااللہ عدالت میں پیش نہیں ہوئے، ان کی جانب سے حاضری معافی کی درخواست دائرکی گئی۔

انسداد منشیات کی خصوصی عدالت کے جج محمد نعیم شیخ نے کیس پرسماعت کی۔

رانا ثنااللہ کی طرف سے سید فرہاد علی شاہ ایڈووکیٹ عدالت میں پیش ہوئے جبکہ اے این ایف کی طرف سے اسپیشل پراسیکیوٹر سونیا جدون بھی عدالت میں پیش ہوئیں۔

اے این ایف نے رانا ثنااللہ، عثمان احمد، سبطین، اکرم، عمرفاروق اورعامر رستم کے خلاف چالان پیش کررکھا ہے۔

چالان میں رانا ثنااللہ کی جانب سے اندرون اور بیرون ملک منشیات اسمگل کرنے کا الزام عائد کیا گیا ہے۔

عدالت میں پراسیکیوٹر سونیا جدون نے کیس کی مختلف شقوں کا جواب دیا۔ پراسیکیوٹرنے رانا ثنااللہ کے اکاؤنٹ منجمد کرنے کے حق میں دلائل دیے۔

سماعت کے دوران پراسیکیوٹر نے دلائل دیے کہ پراسیکیوشن نے قانون کے مطابق ملزم رانا ثنااللہ کے اکاؤنٹ منجمد کیے۔

عدالت نے مزید بحث کے لیے کارروائی 15 اکتوبر تک ملتوی کر دی جبکہ عدالت نے وفاقی وزیررانا ثنااللہ سمیت تمام ملزمان کو آج فرد جرم کیلئے طلب کررکھا تھا۔

ملزمان کی حاضری مکمل نہ ہونے پر فردِ جرم 15 اکتوبرتک مؤخرکردی گئی۔ عدالت نے رانا ثنااللہ کی ایک روزہ حاضری معافی کی درخواست منظور کرلی۔