سابق وزیراعظم نوازشریف کی جائیداد نیلامی پر یوسف عباس سمیت دیگر اعتراض کنندگان نے نئے ترمیمی قانون کے تحت ریلیف مانگ لیا۔

سابق وزیراعظم نوازشریف کے منجمد اثاثے بحال کرنے کی استدعا کرنے والے فریقین پلاٹ الاٹمنٹ ریفرنس نیب کو واپس کرنے کی استدعا کر دی۔

اعتراض کنندگان نے قاضی مصباح ایڈووکیٹ کے توسط احتساب عدالت میں درخواست دائر کی جس میں مؤقف اختیار کیا گیا کہ نیب ترمیمی ایکٹ 2022 کے تحت نیب کو 50 کروڑ سے کم مالیت کے کیس میں کارروائی کا اختیار نہیں ہے۔

درخواست گزاروں نے عدالت کے سامنے مؤقف پیش کیا کہ نوازشریف کیخلاف دائر ریفرنس میں 13 کروڑ کا الزام ہے۔  احتساب عدالت اس ریفرنس کے تین ملزمان میر شکیل، ہمایوں فیض رسول اور بشیر احمد کو پہلے ہی بری کر چکی ہے۔

وکیل قاضی مصباح نے درخواست گزاروں کی جانب سے مؤقف اپنایا کہ عدالت نے نواز شریف کو اشتہاری قرار دے کر جائیدایں قرق کرنے کا حکم دے رکھا ہے۔ نیب ترمیمی آرڈیننس کے تحت اب یہ کیس احتساب عدالت کے دائرہ اختیار میں نہیں۔

یوسف عباس، اقبال برکت سمیت 7 اعتراض کنندگان نے نواز شریف کی جائیداد کی نیلامی کوروکنے کیلئے درخواستیں دائرکررکھی ہیں۔

فریقین کا دعوی ہے کہ جائیداد کی وراثت انہیں منتقل ہو چکی ہے لیکن اشتہاری ہونے پر نواز شریف کے اثاثے قرق کر دیے گئے۔