مراد راس نے کہا ہے کہ انصاف اکیڈمی کے قیام سے سیلاب سے متاثرہ بچے گھر بیٹھے فائدہ اٹھا سکیں گے۔

تفصیلات کے مطابق صوبائی وزیر تعلیم پنجاب مراد راس نے انصاف اکیڈمی کا باقاعدہ آغاز کر دیا، تقریب کا انعقاد قائد اعظم اکیڈمی فار ایجوکیشنل ڈیویلپمنٹ ہیڈکوارٹر لنک وحدت روڈ پر کیا گیا اور لانچنگ تقریب کا آغاز تلاوت کلامِ پاک، نعتِ رسولِ مقبول، اور قومی ترانے سے کیا گیا۔

انصاف اکیڈمی کی لانچنگ تقریب کے موقع پر سیکریٹری محکمہ سکول ایجوکیشن، چئیرمن پی سی ٹی بی، ایم ڈی پی سی ٹی بی، و دیگر موجود تھے

مراد راس نے کہا کہ انصاف اکیڈمی کی شکل میں ایک ایسا ای لرننگ پلیٹ فارم تیار کیا ہے جس کی ماضی میں کوئی مثال نہیں ملتی، دورِ جدید میں طلبا انصاف اکیڈمی جیسے منصوبوں کی مدد سے گھر بیٹھے معیاری تعلیم حاصل کر سکتے ہیں۔

صوبائی وزیر تعلیم پنجاب نے یہ بھی کہا کہ آغاز میں انصاف اکیڈمی کے قیام سے نویں سے بارہویں جماعت کے طلبا مستفید ہو سکیں گے ، انصاف اکیڈمی کو مرحلہ وار دیگر طلبا کے لئے بھی کھولا جائے گا۔

ان کا کہنا تھا کہ پنجاب کریکولم اینڈ ٹیکسٹ بک بورڈ نے انصاف اکیڈمی کے قیام میں قلیدی کردار ادا کیا، انصاف اکیڈمی کے پورٹل پر ہمارے بچوں کے لئے زبردست تعلیمی مواد ڈالا گیا ہے۔

مراد راس کا یہ بھی کہنا تھا کہ انصاف اکیڈمی کے آن لائن پورٹل کی مدد سے پاکستان بھر کے بچے مستفید ہو سکتے ہیں، انصاف اکیڈمی پورٹل پر بچے والدین کی نگرانی میں پڑھنے کے ساتھ ساتھ ٹیسٹ بھی دے سکتے ہیں۔

انہوں نے کہا کہ ہم نے محکمہ سکول ایجوکیشن پنجاب کا اپنا ڈیٹا سینٹر تیار کیا جو آج مکمل طور پر فعال ہے، انصاف اکیڈمی پورٹل کے آن لائن قیام سے اکیڈمی اور ٹیوشن کلچر کی نفی ہوگی۔

مراد راس نے یہ بھی کہا کہ سیلاب کی بدولت پنجاب میں 1 ہزار سے زائد سرکاری سکول متاثر ہوئے جن میں سے 500 کے قریب بحال ہو چکے، انصاف اکیڈمی کے قیام سے سیلاب سے متاثرہ بچے بھی گھر بیٹھے فائدہ اٹھا سکیں گے جبکہ انصاف اکیڈمی کا دائرہ کار مزید بچوں تک بڑھانے کے لیے کام کر رہے ہیں۔

ان کا کہنا تھا کہ گزشتہ ادوار میں دانستہ طور پر محکمہ سکول ایجوکیشن پنجاب کو پیچھے دھکیلا گیا، ہمارے سیاسی مخالفین نہیں چاہتے کہ ہماری آنے والی نسلیں پڑھی لکھی ہوں۔

صوبائی وزیر تعلیم پنجاب کا یہ بھی کہنا تھا کہ 2018 میں جب وزارت ملی تو میرے دفتر کے باہر تبادلوں کے لئے روزانہ درجنوں افراد موجود ہوتے تھے ، ایک روپیہ خرچ کئے بغیر اساتذہ کے تبادلوں کے لئے ای ٹرانسفر سسٹم بنایا گیا۔

انہوں نے کہا کہ میں دعویٰ کرتا ہوں کہ ٹیکنالوجی کے مثبت استعمال سے سب سے زیادہ فائدہ گزشتہ چند سالوں میں محکمہ تعلیم پنجاب نے حاصل کیا جبکہ اساتذہ کے لئے چھٹیوں اور اے سی آرز کے نظام کو بھی مکمل طور پر آن لائن کیا جا چکا ہے۔

مراد راس نے یہ بھی کہا کہ اساتذہ کی بھرپور سہولت اور آسانی کے لئے ریٹائرمنٹ کے نظام کو بھی آن لائن کیا گیا، اب تک 15 ہزار سے زائد اساتذہ بغیر کسی دشواری کے گھر بیٹھے آن لائن ریٹائرمنٹ سرٹیفکیٹ حاصل کر چکے ہیں۔

ان کا کہنا تھا کہ محکمہ تعلیم پنجاب میں آن لائن نظام متعارف کروانے سے سالانہ 10 ارب روپوں کی کرپشن کا خاتمہ ہوا جبکہ انصاف آفٹرنون اسکولز پروگرام کے تحت 7 ہزار سے زائد سکولوں کو اپگریڈ کیا گیا۔

مراد راس نے کہا کہ 7 ہزار سے زائد اسکولوں کو اپگریڈ کرنے پر حکومت کے 6.5 ارب روپے خرچ ہوئے، اگر یہی کام مسلم لیگ ن جیسی جماعتوں کے طریقے سے ہوتا تو کُل 295 ارب روپے خرچ ہوتے۔

انہوں نے یہ بھی کہا کہ پاکستان کی تاریخ میں پہلی بار ٹرانسجینڈرز کے لئے الگ اسکولوں کا قیام عمل میں لایا گیا، اگر یہی کام مسلم لیگ ن جیسی جماعتوں کے طریقے سے ہوتا تو کُل 295 ارب روپے خرچ ہوتے۔

صوبائی وزیر تعلیم پنجاب مراد راس نے مزید کہا کہ اساتذہ کی مکمل توجہ ہمارے بچوں کو پڑھانے پر ہونی چاہیے، اساتذہ اور بچوں کی زندگی آسان کرنے کے لیے اسی رفتار سے کام کرتے رہیں گے۔