عمر سرفراز چیمہ نے کہا ہے کہ عمران خان ڈنکے کی چوٹ پر بات کرتا ہے۔

تفصیلات کے مطابق مشیرِ اطلاعات پنجاب عمر سرفراز چیمہ کا اپنے ایک بیان میں کہنا تھا کہ پی ڈی ایم قائدین کی گفتگو سے عمران خان نکال دیا جائے تو پیچھے ان کے لٹکے ہوئے مایوس چہرے رہ جاتے ہیں۔

ان کا کہنا تھا کہ عمران خان ڈنکے کی چوٹ پر بات کرتا ہے، رات کے اندھیرے میں جدہ یا لندن نہیں بھاگتا۔

عمر سرفراز چیمہ نے کہا کہ میمو گیٹ، ڈان لیکس اور سپریم کورٹ پر حملہ کرنے والے آج اسلام آباد میں چھپ کر بیٹھے ہیں۔

مشیرِ اطلاعات پنجاب نے یہ بھی کہا کہ عمران خان کا بیان ایسے ہی گمنام سازشی کرداروں سے متعلق تھا جو چھپ کر وار کرتے ہیں۔

ان کا کہنا تھا کہ یہ پہلے گمنام نمبروں سے کالز کرتے ہیں، پھر خود ہی اداروں پر حملے کا شور مچا دیتے ہیں اور جب چوری پکڑی جاتی ہے تو یہ مظلوم بن جاتے ہیں۔

عمر سرفراز چیمہ کا یہ بھی کہنا تھا کہ ن لیگ نے دباؤ ڈال کر عدالت سے غیر آئینی فیصلہ حاصل کیا اور حمزہ شہباز کو سی ایم بنایا ، ایک غیر آئینی عدالتی فیصلے کے ذریعے حمزہ کے حلف کے لیے سپیکر قومی اسمبلی کو استعمال کیا گیا۔

مشیرِ اطلاعات پنجاب عمر سرفراز چیمہ کا مزید کہنا تھا کہ لاہور ہائیکورٹ کے لارجر بنچ کے فیصلے سے پنجاب میں ایک غیر آئینی حکومت کا اختتام ہوا۔