عدالت نے نوازشریف اور اسحاق ڈارکی تقریر نشرکرنے کے خلاف درخواست پرڈی جی آپریشنز پیمرا طلب کرلیا۔

تفصیلات کے مطابق لاہورہائی کورٹ میں سابق وزیراعظم میاں نواز شریف اور اور وفاقی وزیراسحاق ڈار کی لائیو تقریر نشر کرنے کیخلاف درخواست پرعدالت نے آئندہ سماعت پر ڈی جی آپریشنز پیمرا کو ذاتی حیثیت میں طلب کیا ہے۔

عدالت نے دوران سماعت کہا کہ پیمرا اپنے ہی بنائے ہوئے قوانین پر عمل کیوں نہیں کر رہا؟

جسٹس شاہد وحید نے شبیراسماعیل کی درخواست پر سماعت کی،  درخواست میں وفاقی حکومت، پیمرا سمیت دیگر کو فریق بنایا گیا ہے۔

درخواست میں مؤقف اپنایا گیا کہ پیمرا نے اشتہاریوں اور مفرور ملزمان کی کوریج، تقاریر وغیرہ نشر کرنے پر پابندی عائد کررکھی ہے۔

شبیراسماعیل کی جانب سے دائر درخواست میں مؤقف پیش کیا گیا کہ نوازشریف کی تقریر تمام ٹی وی چینلز پر براہ راست دکھائی گئی۔

درخواست میں یہ مؤقف بھی اختیار کیا گیا کہ پیمرا اشتہاریوں کی تقاریر نشر نہ کرنے کے حوالے سے اپنے احکامات اور فیصلوں کو برقرار رکھے۔ پیمرا اپنے جاری کیے گئے احکامات کی خلاف ورزی کر رہا ہے۔

وکیل درخواست گزار نے استدعا کی کہ عدالت اشتہاریوں اور مفرور ملزمان کی کوریج، تقاریر پر پابندی کے احکامات پر عملدرآمد کروانے کا حکم دے۔