ہائی کورٹ کے ملتان بنچ نے چیف الیکشن کمشنر سے 13 ستمبر کو تفصیلی رپورٹ طلب کرلی۔

الیکشن کمیشن آف پاکستان کی جانب سے ملک بھر میں ضمنی انتخابات روکنے کے معاملے پراین اے 157 سے پیپلز پارٹی و پی ڈی ایم کے متفقہ امیدوارعلی موسیٰ گیلانی نے ہائیکورٹ سے رجوع کرلیا۔

لاہور ہائیکورٹ ملتان بنچ کے جسٹس شمس محمود کی عدالت میں کیس کی سماعت ہوئی جس میں ہائی کورٹ کے ملتان بنچ نے چیف الیکشن کمشنر سے 13 ستمبر کو تفصیلی رپورٹ طلب کرلی۔

عدالت نے کہا کہ ملتان میں کوئی سیلاب نہیں، الیکشن ملتوی کرنے کی وجوہات بتائی جائیں۔ اگر تفصیلی جواب جمع نہیں ہوتا تو عدالت الیکشن کروانے کا حکم دے سکتی ہے۔ اس سے قبل ایسی نظیر ملتی ہیں جس میں عدالت نے خود الیکشن کا حکم دیا ہو۔

وکیل علی صدیقی نے عدالت کے سامنے مؤقف پیش کیا کہ سیٹ خالی ہونے پر 60 روز کے اندر الیکشن کرانا انتہائی ضروری۔ 20 ستمبر کو 60 روز مکمل ہوجائیں گے لیکن الیکشن کمیشن نے انتخاب روک دیا۔

درخواست گزارنے مؤقف اپنایا کہ حلقہ این اے 157 میں الیکشن سے دو دن پہلے الیکشن کمیشن نےغیرقانونی فیصلہ دے دیا۔ استدعا ہے کہ الیکشن کمیشن کی جانب سے الیکشن ملتوی کا حکم معطل کیا جائے۔

سید علی موسیٰ گیلانی کے وکیل ایڈوکیٹ محمد علی صدیقی نے الیکشن کمیشن کے نوٹی فکیشن کے خلاف لاہور ہائیکورٹ ملتان بینچ میں پٹیشن دائر کی ہے۔