اسلام آباد ہائی کورٹ نے آئی جی اسلام آباد کو حکم دیا کہ کل دس بجےتک لاپتہ شہری کوعدالت پیش کیا جائے۔ 

تفصیلات کے مطابق شہری حسیب حمزہ کے لاپتہ ہونے سے متعلق اسلام آباد ہائی کورٹ میں دوپہردوبجے کے وقفے کے بعد سماعت دوبارہ شروع یوئی۔

آئی جی اسلام آباد چیف جسٹس اطہرمن اللہ کی عدالت میں پیش ہوئی اور عدالت کو بتایا کہ  حسیب حمزہ کی گُمشدگی پر ایف آئی آر درج کی جا چکی ہے۔

چیف جسٹس اطہر من اللہ نے کہا کہ آئی جی صاحب یہ ناقابل برداشت ہے۔ لاپتہ افراد سے متعلق پہلے ایک فیصلہ موجود ہے۔ فیصلے میں قراردیا تھا آئی جی اور متعلقہ افسران ذمہ دار ہوں گے۔ یہ عدالت اب اس فیصلے کے مطابق ہی کی جائے گی

چیف جسٹس اسلام آباد ہائی کورٹ نے آئی جی اسلام آباد کو حکم دیا کہ کل دس بجے تک لاپتہ شہری کوعدالت پیش کیا جائے۔ اگر ایسا نہیں ہوتا ہرایک کو بلا کراس کیخلاف کارروائی کریں گے۔ اگست سے بندہ غائب ہے۔ دنیا کی بہترین ایجنسیوں کیلئے کوئی مسئلہ نہیں کہ اسے پیش نہ کرسکیں۔

عدالت نے شہری کی بازیابی کیلیے زیادہ مہلت دینے کی آئی جی کی استدعا مسترد کرتے ہوئے حکم دیا کہ کل دس بجے تک ہی لاپتہ حسیب کو پیش کریں۔ حسیب کی عدم بازیابی پر کل چیف کمشنر بھی پیش ہوں۔ چلیں دس کی جگہ ساڑھے گیارہ بجے تک پیش کریں۔

چیف جسٹس نے آئی جی سے کہا کہ آپ کو مہلت چائیےتو ساڑھے گیارہ بجے تک دے دیتے ہیں۔ یہ عدالت آپ پراعتماد کر رہی ہے کہ لاپتہ شہری کو پیش کریں گے۔ اس عدالت کی حدود میں یہ سب برداشت نہیں کیا جائے گا۔ وزیراعظم اس عدالت میں لاپتہ افراد کیسزمیں پیش ہو چکے ہیں۔

اس سے قبل اسلام آباد ہائی کورٹ نے لاپتہ شہری کی بازیابی کیلئے دائر درخواست پر سماعت کرتے ہوئے آئی جی اسلام آباد کو دو بجے طلب کیا تھا۔

وکیل درخواست گزارنے عدالت سے کہا کہ 22 اگست کو گھرسے درخواست گزارکے بیٹے کو اٹھایا گیا، پولیس میں ایف آئی آر درج کرنے کی درخواست دی مگر کچھ نہیں ہوا۔ پولیس نے کہا ہمارے پاس نہیں ایجنسیوں کے پاس ہے۔

لاپتہ شہری کی بازیابی سے متعلق درخواست پرچیف جسٹس اطہر من اللہ نے سماعت کی۔