چودھری شجاعت حسین نے کہا ہے کہ ماحولیاتی تبدیلیوں سے پاکستان بہت متاثر ہوا ہے۔

تفصیلات کے مطابق ق لیگ کے سربراہ چوہدری شجاعت حسین نے اسلام آباد میں میڈیا سے بات چیت کرتے ہوئے وزیر اعظم میاں شہباز شریف کے اقوام متحدہ جنرل اسمبلی سے خطاب کو متوازن اور حقیقت پسندانہ قرار دیا اور کہا کہ جنرل اسمبلی میں خطاب کے ذریعے میاں شہباز شریف نے سیلاب، بھارت میں حقوق انسانی کی خلاف ورزیوں، کشمیر اور فلسطین میں مظالم بند کرنے سے متعلق عالمی برادری کے سامنے پاکستان کا مقدمہ دلیری سے پیش کیا ہے۔

انہوں نے کہا کہ ماحولیاتی تبدیلیوں سے پاکستان بہت متاثر ہوا ہے اور تاریخ کے بدترین سیلاب کی تباہ کاریوں کے ازالے اور کروڑوں متاثرین کی بحالی و آبادکاری کے لئے عالمی براداری کو وزیر اعظم کی آواز پر توجہ دینی چاہیے۔

چوہدری شجاعت حسین نے بھارت کو مشورہ دیا کہ وہ خطے میں پائیدار امن، غربت کے خاتمے اور سلامتی و استحکام کا ماحول قائم کرنے کے لئے وزیر اعظم میاں شہباز شریف کی پیش کش قبول کر کے مسئلہ کشمیر اور دیگر تنازعات کے حل کے لئے پاکستان کے ساتھ بات چیت کا آغاز کرے ،بین الاقوامی قرضوں میں ریلیف بھی پاکستان کا حق ہے۔

ق لیگ کے سربراہ چوہدری شجاعت حسین نے مزید کہا کہ میاں شہباز شریف کا خطاب قومی امنگوں کا ترجمان تھا، وزیر اعظم نے عالمی برادری کے سامنے فوری توجہ طلب مسائل کے ساتھ ان کا حل بھی پیش کیا۔