راجہ بشارت نے کہا ہے کہ عوام عمران خان کیساتھ کھڑے ہیں۔

تفصیلات کے مطابق صوبائی وزیر پارلیمانی امور پرسیکیوشن و ماحولیات راجہ بشارت نے بول لاہور بیورو کا دورہ کیا جہاں انہوں نے بول نیوز سے موجودہ سیاسی صورتحال پر خصوصی گفتگو کرتے ہوئے کہا کہ بول ٹی وی حق اور سچ کا ساتھ دے رہا ہے اور جس جرات سے ساتھ دے رہا ہے دلی طور پر شکریہ ادا کرتا ہوں جبکہ بول نیوز تمام مصائب برداشت کر کے جیسے حق پہ کھڑا ہے اس پر خراج تحسین پیش کرتاہوں

انہوں نے کہا کہ اس وقت کوئی دوسری رائے نہیں کہ عوام عمران خان کیساتھ کھڑے ہیں،۔عوام جان چکے ہیں کہ اگر ترقی یافتہ اور آزاد پاکستان چاہیے تو عمران خان کا ساتھ دینا پڑے گا۔

صوبائی وزیر کا کہنا تھا کہ عمران خان جب کہتا ہے کہ کسی سے ڈکٹیشن نہیں لوں گا تو دراصل عوام کے دل کی بات کرتا ہے، آپ عام پاکستانی سے پوچھیں وہ آزاد رہنا چاہتا ہے یا غلام تو وہ کہے گا آزاد۔

ان کا یہ بھی کہنا تھا کہ آج پنجاب میں تحریک انصاف کی حکومت ہے،25 مئی کو جواس وقت کی حکومت نے بربریت کیے وہ قابل مذمت ہے جبکہ جب ہم عدالتوں کے سامنے گئے تو عدالتوں نے بھی ہمارے موقف سے اتفاق کیا اور تسلیم کیا کہ 25 کو لوگوں سے زیادتی کی گئی۔

صوبائی وزیر پارلیمانی امور پرسیکیوشن و ماحولیات راجہ بشارت کا مزید کہنا تھا کہ عمران خان خود کارکنان سے ملاقاتیں کر رہے ہیں یہی لانگ مارچ کی تیاری ہے۔ لانگ مارچ ضرور ہوگا لیکن اس کا مطلب یہ نہیں کہ کوئی غیر قانونی کام ہوگا، لانگ مارچ ہمارا سیاسی و آئینی حق ہے قانون اور آئین کے دائرے میں رہتے ہوئے ہم اسے استعمال کریں گے، انشاللہ۔