یاسمین راشد نے کہا ہے کہ الیکشن کمیشن ن لیگ کا ذاتی ملازم بنا ہوا ہے۔

تفصیلات کے مطابق صوبائی وزیر صحت اور صدرپی ٹی آئی سنٹرل پنجاب ڈاکٹر یاسمین راشد نے عوامی احتجاج کے شرکاء سے خطاب کرتے ہوئے کہا کہ ہم الیکشن کمیشن کی جانب سے عمران خان کے خلاف غیر قانونی فیصلہ کی پر زور مذمت کرتے ہیں۔

اس موقع پر ڈاکٹریاسمین راشد نے کہا کہ بابوصابو پر ہزاروں کارکنان الیکشن کمیشن کے فیصلے کے خلاف اکھٹے ہوئے ہیں، بابوصابوانٹرچینج پر مختصر کال پر کارکنان کاجم غفیر آچکا ہے۔

ڈاکٹریاسمین راشد نے یہ بھی کہا کہ الیکشن کمیشن ن لیگ کا ذاتی ملازم بنا ہوا ہے، شہبازشریف یہ ذہن میں بٹھالویہ پارٹی ڈرنے والی نہیں ہے۔

ان کا کہنا تھا کہ پاکستان تحریک انصاف پاکستان سے محبت کرنے والی پارٹی ہے جبکہ پاکستانی قوم بھی غیرت مند ہے تمہارے جیسی بے غیرت نہیں ہے۔

صوبائی وزیر صحت کا یہ بھی کہنا تھا کہ تم امریکہ سے پہلے طماچے کھاتے ہواور پھراسکے بوٹ پالش کرتے ہو، وفاقی حکومت کی جانب سے اوچھے ہتھکنڈوں کوکسی صورت برداشت نہیں کریں گے۔

ڈاکٹر یاسمین راشد نے کہا کہ عمران خان نے تو کہا ہے کہ عام انتخابات کرواؤ، ہمیں چھان بورے کی حکومت راستے بند کرنے پر مجبورکررہی ہے، ہم امپورٹڈ حکومت کے خلاف ہمیشہ اپنا احتجاج ریکارڈ کرواتے رہیں گے

انہوں نے یہ بھی کہا کہ وفاقی حکومت کو حیا شرم نہیں ہے لیکن ہم توشرم والے لوگ ہیں، پاکستان ایک آزاد ملک ہے، پاکستان کسی صورت امریکہ کی غلامی قبول نہیں کرے گا۔

ان کا کہنا تھا کہ عوام کے سمندرنے الیکشن کمیشن کے فیصلے کو مسترد کردیا ہے، عمران خان جیسے لیڈرنے پوری دنیا میں پاکستان اور اسلام کا بول بالا کروایا، عمران خان ایک سچے اور اچھے مسلمان ہیں۔

یاسمین راشد کا یہ بھی کہنا تھا کہ ن لیگ والے امریکہ کے یارہیں اورغدار ہیں، پاکستان امریکہ کیلئے ہمیشہ ایک خطرناک ملک ہی رہے گا، جوبائیڈن نے پاکستان سے ڈرکر ملکی سالمیت کے بارے میں گٹھیا بیان دیا ہے۔

صوبائی وزیر صحت ڈاکٹریاسمین راشد کا مزید کہنا تھا کہ عمران خان کی قیادت میں پاکستان ترقی کررہا تھا، عوام تمہیں ہر انتخاب میں شکست دے گی۔