حافظ نعیم الرحمٰن نے کہا ہے کہ جماعت اسلامی صرف ایمانداری کی بنیاد پر سیاست کرتی ہے۔

تفصیلات کے مطابق امیر جماعت اسلامی کراچی حافظ نعیم الرحمٰن نے بلدیاتی انتخابی مہم اور تیاریوں کے سلسلے میں بلدیاتی امیدواروں کے کنونشن سے خطاب کرتے ہوئے کہا کہ الیکشن کمیشن پاکستان 23 اکتوبر کو بلدیاتی انتخابات کے انعقاد کو یقینی بنانے کا واضح اور دو ٹوک اعلان کرے۔

انہوں نے کہا کہ الیکشن کمیشن سندھ حکومت کی کروڑوں روپے کی اشتہاری مہم کا بھی نوٹس لے اور اشتہارات بھی بند کروائیں کیونکہ یہ انتخابی ضابطے کی کھلم کھلا خلاف ورزی ہے۔

ان کا کہنا تھا کہ جماعت اسلامی نے ہر دور میں عوامی مسائل کو حل کرنے کی کوشش کی، لوگوں کی خدمت کی اور ہمیں جب بھی موقع ملا کراچی کی بلدیہ میں ہم نے مثالی اور ریکارڈ ترقیاتی کام کروائے۔

امیر جماعت اسلامی کراچی حافظ نعیم الرحمٰن نے مزید کہا کہ جماعت اسلامی دولت کی بنیاد پر سیاست نہیں کرتی صرف ایمانداری کی بنیاد پر سیاست کرتی ہے۔

کنونشن سے جماعت اسلامی کراچی و الیکشن سیل کے نگراں راجہ عارف سلطان اور سیکریٹری کراچی منعم ظفر خان نے بھی خطاب کیا۔

راجہ عارف سلطان نے الیکشن سے قبل اور الیکشن ڈے پر پولنگ اسٹیشنز کے اندر پولنگ ایجنٹس اور امیدواران کی ذمہ داریوں کے حوالے سے ضروری ہدایات اور اہم نکات بیان کیے۔

کنونشن سے شہر بھر سے جماعت اسلامی کے نامزد امیدوار برائے چیئرمین، وائس چیئرمین اور وارڈ کونسلر نے بھی شرکت کی۔