دنیا بھر میں واٹس ایپ سرور منقطع ہونے پر کمپنی نے صارفین سے معذرت کرتے ہوئے کہا کہ ہم معذرت خواہ ہیں۔

تفصیلات کے مطابق آج پاکستان سمیت دنیا بھر کے بیشتر ممالک میں واٹس ایپ سروس معطل ہو گئی تھی، جس کی وجہ سے صارفین کو شدید مشکلات کا سامنا کرنا پڑا۔

ایک غیر ملکی خبر رساں ادارے کی رپورٹس کے مطابق واٹس ایپ سروس کی خرابی کے باعث افواہوں کا بازار گرم ہو گیا تھا، کچھ نے واٹس ایپ سرور ڈاؤن ہونے کا بتایا جبکہ کچھ نے واٹس ایپ کی ایپ مکمل طور پر کریش ہونے کی اطلاع دی۔

واٹس ایپ انتظامیہ کا کہنا تھا تھا کہ ہم جانتے ہیں کہ آج دنیا بھر میں صارفین کو پیغامات بھیجنے اور موصول کرنے میں دشواری کا سامنا کرنا پڑا ہے جس کے لیے ہم معذرت خواہ ہیں۔

واضح رہے کہ سوشل میڈیا ایپس فیس بک ، انسٹا گرام اور واٹس ایپ کی مالک ’میٹا‘ کمپنی ہے، میٹا کمپنی کے ترجمان نے ایک بیان میں کہا کہ آج کروڑوں صارفین کو شدید مشکلات کا سامنا کرنا پڑا جس پر ہم بے حد شرمندہ ہیں۔

میٹا کے ترجمان کا کہنا تھا کہ یہ ایک تکنیکی خرابی تھی جس دور کر دیا گیا ہے۔

معروف آن لائن ٹول ڈٓاؤن ڈیٹیکٹر نے آج دوپہر 12 بجکر 7 منٹ پر واٹس ایپ میں خرابی سے متعلق رپورٹس ریکارڈ کیں، اور دوپہر 1 بجے تک 25 ہزار شکایات موصول ہوئیں۔

 تقریباً 70 فیصد صارفین نےاپنے پیغام بھیجنے اور موصول کرنے کے حوالے سے شکایات کیں، جبکہ دوپہر 3 بجے تک سروس میں بحالی کا آثار نظر آئے

واٹس ایپ کی خرابی کے باعث صارف کی بنیاد پر واٹس ایپ کی سب سے بڑی مارکیٹ اٹلی، ترکی اور بھارت سمیت دیگر ممالک میں صارفین کی شکایات کے ڈھیر لگا دیئے۔

برطانوی خبر رساں ادارے کے مطابق انگلینڈ میں واٹس ایپ کی سروس جزوی طور معطل ہوئی تھی جس کی وجہ سے متاثر ہونے صارفین کی تعداد کم رہی۔

واضح رہے کہ سوشل میڈیا کی ایپ واٹس ایپ کو دنیا بھر میں دو بلین سے زائد افراد رابطوں اور دیگر عوامل کے لیے استعمال کرتے ہیں۔

کمپنی کا کہنا تھا فوری طور تکینکی خرابی کو دور کرنے اور سروس کو مکمل طور پر بحال کرنے کی کوششوں کا آغاز کر دیا گیا ہے۔

واٹس ایپ کی معطلی ٹوئٹر پر ہیش ٹیگ بن گیا جس کے بعد میمز کی بھرمار ہو گئی، صارفین کا کہنا تھا کہ وہ اسے ایپ کے بجائے انٹرنیٹ کا مسلہ سمجھ رہے تھے۔

یاد رہے کہ گزشتہ سال کے بعد واٹس ایپ کی اس طرح کی پہلی عالمی بندش تھی۔