مراد راس نے کہا ہے کہ بدقسمتی سے ہمارے مُلک میں تعلیم کبھی بھی حکمران جماعتوں کی ترجیح نہیں رہی۔

تفصیلات کے مطابق صوبائی وزیر تعلیم پنجاب مراد راس نے لاہور چیمبر آف کامرس اینڈ انڈسٹری میں منعقدہ سیمینار میں شرکت کی، سیمینار کے انعقاد کا بنیادی مقصد ٹیکنالوجی کے مثبت اور جامع استعمال سے طلبا کے لیے تعلیم کی فراہمی میں آسانی پیدا کرنا تھا۔

مراد راس نے کہا کہ مسائل کی باقاعدہ نشاندہی کے بغیر ان کا مستقل بنیادوں پر حل ممکن نہیں، بدقسمتی سے ہمارے مُلک میں تعلیم کبھی بھی حکمران جماعتوں کی ترجیح نہیں رہی۔

انہوں نے یہ بھی کہا کہ سرکاری اسکولوں کے نظام کو گزشتہ حکومتوں کی جانب سے دانستہ طور پر نجی سیکٹر کے فروغ کیلئے پیچھے دھکیلا گیا

صوبائی وزیر تعلیم پنجاب کا کہنا تھا کہ 1984  سے اب تک پرائیویٹ اسکول ایکٹ میں کوئی ترمیم و تبدیلی نہیں کی گئی جبکہ 30 سے 40 سال میں کمزور ہونے والا تعلیمی نظام چند سالوں میں ٹھیک نہیں ہو سکتا۔

مراد راس کا یہ بھی کہنا تھا کہ جب حکومت ملی تو اساتذہ کو پڑھانے کی بجائے محکمے کے انتظامی امُور میں پھنسا کر رکھا جاتا تھا، آج محکمہ سکول ایجوکیشن پنجاب میں اساتذہ کے تمام امُور آن لائن سسٹم پر ہیں۔

انہوں نے کہا کہ آج محکمہ تعلیم پنجاب میں اساتذہ کے تبادلے، چھٹیاں، اے سی آرز، پینشن، ریٹائرمنٹ و دیگر اموُر آن لائن سسٹم کے تحت چل رہے ہیں، محکمہ تعلیم پنجاب میں ٹیکنالوجی کے مثبت استعمال کی بدولت سالانہ قریب 10 ارب روپوں کی بدعنوانی کا خاتمہ ہوا ہے

صوبائی وزیر تعلیم پنجاب کا کہنا تھا کہ آج اساتذہ کی مکمل توجہ ہمارے بچوں کو پڑھانے پر مرکوز ہے، آج یکساں نصاب تعلیم پر عملدرآمد ہو رہا ہے، نجی سکولوں کی رجسٹریشن بھی آن لائن ہوتی ہے۔

ان کا یہ بھی کہنا تھا کہ حال ہی میں نویں سے بارہویں جماعت کے طلبا کیلئے انصاف اکیڈمی کا قیام عمل میں لایا گیا، انصاف اکیڈمی پورٹل پر طلبا جدید ٹیکنالوجی کی مدد سے مفت آن لائن تعلیم حاصل کر رہے ہیں

صوبائی وزیر تعلیم پنجاب مراد راس کا منزید کہنا تھا کہ مسلم لیگ ن جیسی جماعتیں نہیں چاہتیں کہ ہماری آنے والی نسلیں پڑھی لکھی ہوں، سیاست کو تعلیم سے ہمیشہ دور رہنا چاہیے، یہ ہمارے بچوں کے مستقبل کا معاملہ ہے۔

منعقدہ سیمینار میں مینیجنگ ڈائریکٹر پی سی ٹی بی، سیکریٹری پی سی ٹی بی ، پریزیڈنٹ ایل سی سی آئی کاشف انور، ممبران ایل سی سی آئی و دیگر موجود تھے۔