جاپان کے دفاعی حکام نے دعویٰ کیا ہے آج صبح شمالی کوریا نے دو بیلسٹک میزائل فائر کئے ہیں۔

تفصیلات کے مطابق شمالی کوریا نے آج صبح سویرے دو بیلسٹک میزائل داغے ہیں۔ جاپان کے دفاعی حکام نے خیال ظاہر کیا ہے کہ یہ میزائل ملک کے خصوصی اقتصادی زون سے باہر پانیوں میں گرے۔

جنوبی کوریائی فوج کا کہنا ہے کہ شمالی کوریا نے مُنچون قصبے کے نزدیک سے، كم فاصلے تک مار کرنے والے دو بیلسٹک میزائل بحیرۂ جاپان کی طرف داغے ہیں۔

جنوبی کوریا کے ماہرین کے مطابق پرواز کے فاصلے، بلندی اور رفتار کو دیکھتے ہوئے کہا جا سکتا ہے کہ شاید یہ كم فاصلے تک مار کرنے والے بیلسٹک میزائل تھے جنہیں شمالی كوریا ’’سپر بڑے راکٹ‘‘ کہتا ہے۔

جاپان کے دفاعی حکام اس امکان کا جائزہ لے رہے ہیں کہ آبدوز سے داغے جانے والے بیلسٹک میزائل استعمال کیے گئے تھے۔

ایک جاپانی عہدیدار نے بتایا کہ ٹوکیو نے بیجنگ میں شمالی کوریا کے سفارت خانے کے توسط سے سخت احتجاج كیا ہے۔

ان میزائلوں كا تازہ ترین داغا جانا درمیانی شب کے بعد ہوا۔ جنوبی کوریا کے خبر رساں ادارے کے ایک ماہر کا حوالہ دیتے ہوئے بتایا ہے کہ شمالی کوریا شاید یہ ظاہر کرنا چاہتا ہے کہ وہ اپنی مرضی کے وقت اور مقام پر میزائل داغنے کی صلاحیت رکھتا ہے۔