پرتگال کے اسٹار فٹبالر کرسٹیانو رونالڈو نے ایک اور بڑا اعزاز اپنے نام کرلیا۔

پرتگال سے تعلق رکھنے والے اسٹار فٹبالر کرسٹیانو رونالڈو  نے کلب فٹبال میں 700 گول مکمل کرلیے، انہوں نے  یہ کارنامہ مانچسٹر اور ایورٹن کے مابین کھیلے جانے والے پریمیئر لیگ کے میچ میں سر انجام دیا جس میں انہوں نے اپنی ٹیم کو 1-2 سے کامیابی دلوائی۔

یوں کرسٹیانو رونالڈو 700 گول کرنے والے دنیا کے پہلے فٹبالر بن گئے ہیں۔ اس کے علاوہ کرسٹیانو رونالڈو 117 انٹرنیشنل گولز بھی کر چکے ہیں۔

کرسٹیانو رونا لڈو نے اپنے کیریئر میں 5 کلبز کی نمائندگی کی۔ اس دوران انہوں نے ریال میڈرڈ کے لیے 450، مانچسٹر یونائیٹڈ کے لیے 144، یووینٹس کیلئے 101 اور اسپورٹنگ لزبن کیلئے 5 گول اسکور کیے۔

اس سے قبل رونالڈو نے مانچسٹر یونائیٹیڈ کی نمائندگی کرتے ہوئے 118 گول اسکور کیے تھے اور دوبارہ معاہدہ ہونے کے بعد وہ اب تک 26 گول اسکور کرچکے ہیں۔

رونالڈو گزشتہ سیزن میں مانچسٹر یونائیٹڈ کی جانب سے ٹاپ گول اسکورر تھے تاہم نئے مینجر ایرک ٹین ہیگ کے آنے کے بعد وہ خاطر خواہ کارکردگی نہیں دکھاسکے ہیں۔

کلب فٹبال میں 700 گول اسکور کرنے کا اعزاز حاصل کرنے پر ایرک ٹین ہیگ نے کرسٹیانو رونالڈو کی تعریف کرتے ہوئے کہا کہ 700 گول اسکور کرنا آسان کام نہیں اور یہ بہت بڑا سنگ میل ہے، اس پر رونالڈو کی جتنی تعریف کی جائے کم ہے۔

واضح رہے کہ چند روز قبل کرسٹیانو رونالڈو کی ریٹائرمنٹ کی خبریں گردش کررہی تھیں جس پر انہوں نے ایک بیان میں واضح کیا کہ فٹ بال کے گراؤنڈ میں میرا سفر ابھی ختم نہیں ہوا۔