کےالیکٹرک کے بلوں میں کے ایم سی ٹیکس وصولی کے معاملے پر سندھ ہائی کورٹ نے تحریری عبوری حکم جاری کردیا۔

تفصیلات کے مطابق سندھ ہائی کورٹ میں کے الیکٹرک بلوں میں کے ایم سی ٹیکس وصولی سے متعلق کیس میں عدالت نے تحریری عبوری حکم میں کہا کہ عثمان فاروق، سیف الدین ایڈووکیٹس درخواست گزاران کی جانب سے پیش ہوئے۔ عارف شیخ، احتشام اللہ خان بھی درخواست گزاران کی جانب سے پیش ہوئے۔

عبوری حکم نامے میں کہا گیا کہ ایس حسن مجتبی عابدی، عذرا مقیم ایڈووکیٹس کے ایم سی کی جانب سے پیش ہوئے اورمحمد عارف ایڈووکیٹ اور ایڈمنسٹریٹر کراچی مرتضی وہاب بھی پیش ہوئے۔ قاضی عمیر ایڈووکیٹ، سید عرفان علی شاہ کے الیکٹرک کی جانب سے پیش ہوئے۔ جام محسن آفتاب اور سیف جتوئی کے الیکٹرک کی جانب سے پیش ہوئے۔

عدالت نے کہا کہ ایان مصطفی میمن ایڈووکیٹ کے الیکٹرک کی جانب سے پیش ہوئے۔ ڈپٹی اٹارنی جنرل محمد قاسم اور اسسٹنٹ ایڈووکیٹ جنرل مہران خان بھی پیش ہوئے۔ کے الیکٹرک نے ایک درخواست میں جواب جمع کرایا۔ منیر اے ملک اور خالد جاوید خان کو معاون خصوصی مقررکیا جاتا ہے۔

عبوری حکم میں کہا گیا کہ منیراے ملک، بیرسٹر خالد جاوید خان کو نوٹس جاری کیے جاتے ہیں۔ فریقین معاونین خصوصی کو تمام دستاویزات کی نقول فراہم کریں۔ کیس کی سماعت 26 اکتوبر صبح 11 بجے کے لیے ملتوی کی جاتی ہے۔ آئندہ سماعت تک حکم امتناعی میں توسیع کی جاتی ہے۔