احتساب عدالت کراچی نے ملزمان کے وکیل کی غیرحاضری کے باعث سماعت بغیرکارروائی کے ملتوی کر دی۔

تفصیلات کے مطابق احتساب عدالت کراچی میں کے پی ٹی میں غیر قانونی الاٹمنٹ سے متعلق ریفرنس کی سماعت ہوئی۔ ملزمان کے وکیل کی غیر حاضری کے باعث سماعت بغیر کارروائی کے ریفرنس کی سماعت 21 نومبر تک ملتوی کردی۔

ریفرنس میں سابق چیئرمین کے پی ٹی وائس ایڈمرل (ر) احمد حیات اور سی ای او کراچی انٹرنیشنل کنٹینر ٹرمینل خرم عباس و دیگر شامل ہیں۔

نیب کا کہنا ہے کہ ملزموں نے کراچی انٹرنیشنل کنٹینر ٹرمینل کو غیر قانونی طور پر زمین الاٹ کی۔ ملزمان کی کرپشن کی وجہ سے قومی خزانے کو 21.65 ارب کا نقصان ہوا۔

دوسری جانب احتساب عدالت کراچی میں این آئی سی وی ڈی میں مبینہ کرپشن اور غیر قانونی بھرتیوں سے متعلق نیب انکوائری کی بھی سماعت ہوئی۔

این آئی سی وی ڈی کے ایگزیکٹو ڈائریکٹر ندیم قمر کی درخواست ضمانت پر سماعت کے دوران عدالت نے ندیم قمر کی درخواست ضمانت واپس لینے پرخارج کردی۔

نیب پراسیکیوٹرکا کہنا ہے کہ نیب آرڈیننس میں حالیہ ترمیم کے بعد انکوائری کے دوران کسی کو گرفتار نہیں کیا جا سکتا ہے۔

وکیل ندیم قمر نے عدالت سے کہا کہ ڈاکٹر ندیم قمر کی درخواست واپس لینا چاہتے ہے، نیب پراسیکیوٹر کی جانب سے ندیم قمر کی درخواست ضمانت واپس لینے پر کوئی اعتراض نہیں کیا۔

نیب کے مطابق ڈاکٹر ندیم قمر و دیگر کے خلاف این آئی سی وی ڈی میں مبینہ کرپشن اور غیر قانونی بھرتیوں کا الزام ہے۔