اسلام آباد ہائی کورٹ نے فارن ایکسچینج ایکٹ کا مقدمہ بنکنگ کورٹ کو بھیجنے کا تفصیلی فیصلہ جاری کردیا۔ 

تفصیلات کے مطابق اسلام آباد ہائی کورٹ میں ممنوعہ فنڈنگ کیس میں سابق وزیراعظم عمران خان، طارق شفیع ، فیصل مقبول و دیگر کے خلاف فارن ایکسچینج ایکٹ کے تحت مقدمے میں فارن ایکسچینج ایکٹ کے تحت مقدمے کا عدالتی دائرہ اختیار کا تعین کردیا گیا۔

سابق وزیر اعظم عمران خان ، طارق شفیع ، فیصل مقبول و دیگر کے خلاف کیس بنکنگ کورٹ کو منتقل کرتے ہوئے اسلام آباد ہائی کورٹ نے فارن ایکسچینج ایکٹ کے مقدمے کا تفصیلی فیصلہ جاری کردیا۔

تفصیلی فیصلہ میں کہا گیا کہ اسپیشل جج سینٹرل کے پاس عمران خان کی زیر التواء درخواست ضمانت بھی بنکنگ کورٹ کو منتقل کردی گئی ہے اور مقدمہ ایف آئی آر کی بنیاد پر شروع ہوا لہذا سپریم کورٹ کی ہدایت کے مطابق کیس بنکنگ کورٹ کو منتقل کیا جا رہا ہے۔

اسلام آباد ہائی کورٹ کے تفصیلی فیصلے کے مطابق ملزمان طارق شفیع اور فیصل مقبول کی دو ہفتوں کی حفاظتی ضمانت منظور کی جاتی ہے۔ طارق شفیع اور فیصل مقبول پانچ روز میں ایف آئی اے کے سامنے شامل تفتیش ہوجائیں۔ فارن ایکسچینج ایکٹ کے تحت درج مقدمے کے ملزمان بنکنگ کورٹ سے رجوع کریں۔

اسلام آباد ہائی کورٹ کے جسٹس محسن اختر کیانی نے 16 صفحات پر مشتمل تفصیلی فیصلہ جاری کردیا۔