ریلوے حکام نے ٹرین آپریشن کی بحالی کے ساتھ ہی مسافر ٹرینوں کے کرایوں میں اضافہ کردیا، محکمہ ریلوے کی جانب سے کرایوں میں اضافے کا نوٹیفکیشن بھی جاری کردیا گیا ہے۔

نوٹیفکیشن کے مطابق کراچی اور پشاور کے درمیان براستہ لاہور چلنے والی خیبر میل ٹرین کی اے سی سلیپر کلاس کا کرایہ 11 ہزار روپے کردیا ہے جبکہ خیبر میل اے سی بزنس کلاس کا کرایہ بڑھا کر 8 ہزار روپے کردیا گیا ہے۔

خیبر میل اے سی اسٹینڈرڈ کلاس کا کرایہ بڑھا کر7 ہزار روپے کردیا ہے اور خیبر میل ٹرین کی اکانومی کلاس کا کرایہ بڑھا کر 3 ہزار روپے کردیا گیا ہے۔

لاہور سے براستہ فیصل آباد کراچی کے درمیان چلنے والی قراقرم ایکسپریس ٹرین کی اکانومی کلاس کا کرایہ 3ہزار روپے کیا گیا ہے ، ٹرین کی اکانومی کلاس کا کرایہ 3ہزار روپے کردیا گیا جبکہ اور قراقرم ایکسپریس ٹرین کی اے سی اسٹینڈرڈ کا کرایہ بھی 8 ہزار روپے کر دیا گیا ہے۔

کراچی ایکسپریس ٹرین کا لاہور اور کراچی کے درمیان اے سی سلیپر کلاس کا کرایہ بڑھا کر 9 ہزار روپے کردیا گیا ہے جبکہ ٹرین کی اے سی بزنس کلاس کا کرایہ 5ہزار 700 سے بڑھا کر7 ہزار روپے کردیا گیا ہے۔

کراچی ایکسریس اے سی اسٹینڈرڈ کلاس کا کرایہ 4 ہزار 150سے بڑھا کر 5ہزار روپے کردیا گیا ہے جبکہ کراچی ایکسپریس ٹرین کی اکانومی کلاس کا کرایہ بھی بڑھا کر 3 ہزار روپے کردیا گیا ہے۔

لاہور سے کراچی جانے والی رحمان بابا ایکسپریس ٹرین کی اے سی بزنس کلاس کا کرایہ بڑھا کر9 ہزار روپے کردیا ہے جبکہ اے سی اسٹینڈرڈ کلاس کا کرایہ بڑھا کر 8 ہزار روپے ہو گیا ہے اور رحمان بابا ایکسپریس ٹرین کی اکانومی کلاس کا کرایہ بڑھا کر 3 ہزار روپے کردیا گیا ہے۔

لاہور اور کراچی کے درمیان براستہ ساہیوال چلنے والی پاک بزنس ایکسپریس ٹرین کی اے سی بزنس کلاس کا کرایہ بھی بڑھا کر7 ہزار روپے کردیا گیا ہے جبکہ اے سی اسٹینڈرڈ کلاس کا کرایہ بڑھا کر 5 ہزار اور اکانومی کلاس کا کرایہ بھی بڑھا کر 3 ہزار روپے کر دیا گیا ہے۔

نئے کرایوں کا اطلاق آج سے ہوگا اور اس حوالے سے ملک بھر کے تمام ڈویژنل سپرنٹنڈنٹس اور ڈویژنل کمرشل آفیسر کو نوٹیفکیشن جاری کردیا گیا ہے۔

لاہور سے کراچی کے لئے ٹرین آپریشن 5اکتوبر سے بحال ہوگا جبکہ لاہور سے کراچی کے لئے خیبر میل ایکسپریس ٹرین پلیٹ فارم نمبر 4سے روانہ ہوگی۔

سیلابی پانی کم ہونے کے بعد ٹرینوں کی مرحلہ وار بحالی شروع

دوسری جانب اندرون سندھ ریلوے ٹریک پر سیلابی پانی کم ہونے کے بعد ٹرینوں کی مرحلہ وار بحالی شروع کردی گئی ہے۔

ریلوے ہیڈکوارٹر کی جانب سے اضافی کرایوں کے ساتھ 5 ٹرینوں کی بحالی کا نوٹیفکیشن جاری کردیا گیا ہے۔

جاری کردہ نوٹیفکیشن میں بتایا گیا کہ کراچی اور لاہور کے درمیان چلنے والی 3 جبکہ  کراچی سے پشاور جانے والی 2 ٹرین بحال کی گئی ہیں۔

نوٹیفکیشن کے مطابق کراچی ایکسپریس، قرارقرم، پاک بزنس، خیبر میل اور رحمان بابا ایکسپریس کو بھی بحال کیا گیا ہے۔

واضح رہے کہ بحالی کے بعد بھی ٹرینیں تاخیر کا شکار ہیں، خیبر میل ایکسپریس مقررہ وقت سے ڈیڑھ گھنٹہ تاخیر سے ملتان پہنچے گی جبکہ رحمان بابا ایکسپریس 2 گھنٹے کا شکار ہے۔