پی ٹی آئی نے منی لانڈرنگ کیس پر رد عمل دیتے ہوئے کہا کہ شہباز شریف اور حمزہ شہباز کا منی لانڈرنگ جیسے اوپن اینڈ شٹ کیس میں بری ہونا کوئی بریکنگ نیوز نہیں، جسے فرد جرم عائد ہونے کے دن ملک کا وزیراعظم بنا دیا گیا ہو وہ اپنے ماتحت ادارے کو اپنے خلاف کیس کیسے جیتنے دیتا۔

تفصیلات کے مطابق وزیراعظم  شہباز شریف اور ان کے صاحبزادے حمزہ شہباز  ایف آئی اے منی لانڈرنگ کیس میں بری ہوگئے۔ اسپیشل سینٹرل کورٹ لاہور نے منی لانڈرنگ کیس میں شہباز شریف اور حمزہ شہباز کی بریت کا فیصلہ سنایا۔

وزیراعظم شہباز شریف نے منی لانڈرنگ کیس میں بری ہونے پر خوشی کا اظہار کرتے ہوئے کہا کہ حق ذات نے پھر فضل فرمایا، منی لانڈرنگ کے جھوٹے، بے بنیاد، سیاسی انتقام پر مبنی مقدمے سے بریت کا یہ دن دکھایا، اس پر اللہ تعالیٰ کا جتنا شکر اداکریں، کم ہے۔

یہ بھی پڑھیں؛ منی لانڈرنگ کیس، شہباز شریف اور حمزہ شہباز بری 

انہوں نے ٹوئٹ میں لکھا ’’بدترین چیرہ دستیوں، ریاستی قوت کے استعمال اور اداروں کو یرغمال بنانے کے باوجود ہم عدالت، قانون اور عوام کے سامنے سرخرو ہوئے۔

عمران اسماعیل

سابق گورنر سندھ عمران اسماعیل نے ٹوئٹ کرتے ہوئے کہا کہ شریف فیملی جس تیزی سے کیسز میں بری ہورہی ہے تعجب ہی کیا جاسکتا ہے، کاش جیلوں میں موجود عام قیدیوں کو بھی یہی سہولت میسر ہوتی، حکومت میں آکر لوٹ مارکرو اور این آر او لیکر چوری حلال کراؤ، عظیم ملک کو دو خاندانوں نے کہاں پہنچا دیا ہے.

شبلی فراز

سابق وفاقی وزیر شبلی فراز نے ٹوئٹ میں کہا کہ شہباز شریف اور حمزہ شریف کی منی لانڈرنک کیس سے بریت پر فیض احمد فیض کا ایک مصرعہ  یاد آیا ، ’’ہیں سنگ و خشت مقید اور سگ آزاد‘‘۔

عثمان ڈار 

پاکستان تحریک انصاف کے رہنما عثمان ڈار نے کہا کہ شہباز شریف اور حمزہ شہباز کا منی لانڈرنگ جیسے اوپن اینڈ شٹ کیس میں بری ہونا کوئی بریکنگ نیوز نہیں، جسے فرد جرم عائد ہونے کے دن ملک کا وزیراعظم بنا دیا گیا ہو وہ اپنے ماتحت ادارے کو اپنے خلاف کیس کیسے جیتنے دیتا؟ عمران خان کی جنگ اسی نظام کے خلاف ہے جس میں ادارے تباہ ہو رہے ہیں.

فواد چوہدری 

سابق وفاقی وزیر اطلاعات فواد چوہدری نے کہا کہ 24  ارب روپے کی منی لانڈرنگ شہباز شریف اورحمزہ شریف کے سرپرُواری، عدالتی نظام کے عوام کے منہ پر ایک اور طمانچہ ہے۔

انہوں نے کہا کہ 14 ہزاراکاؤنٹس پر عرق ریزمحنت کے اور فُول پروف مقدمہ یہ پاکستان کے لوگوں کے پیسے ہیں، ایک طرف سیلاب زدگان کیلئے پیسے مانگ رہے ہیں تو دوسری طرف ایک خاندان اربوں روپے کھا گیا۔

فرخ حبیب

پی ٹی آئی رہنما فرخ حبیب کا کہنا تھا کہ یہ ہے این آر او ٹو ۔ 16  ارب کا رمضان شوگرز ملز کے ملازمین کے نام پر لوٹ مار کرنے والے حمزہ، شہباز شریف بری ہوگئے جس مقدمہ میں سلمان شہباز اشتہاری ہے، ایف آئی اے  ڈائریکٹر ڈاکٹر رضوان کو مروا دیا ، ملزم مقصود چپڑاسی کو مروادیا۔۔ پراسیکوٹر اپنا لگوا لیا ، نکلو اس کرپٹ نظام کیخلاف ۔

سراج الحق 

بعد ازاں امیر جماعت اسلامی سراج الحق نے ٹوئٹ کرتے ہوئے کہا کہ اگر کسی کا احتساب نہیں ہونا اور سب نے ‘باعزت’ بری ہونا ہے تو احتساب کے ادارے ختم کر دیں تاکہ ان پر قوم کا پیسہ خرچ نہ ہو۔

انہوں نے کہا کہ ایک طرف قوم کا پیسہ لوٹا جاتا ہے، دوسری طرف اس کی واپسی کے نام پیسہ پانی کی طرح بہتا ہے اور ہاتھ کچھ نہیں آتا، ہر دو طرح سے قوم خسارے میں رہتی ہے، یہ کیسا نظام ہے جس میں کسی کے اشارہ ابرو سے ایک وقت میں جس رفتار سے کسی کے خلاف مقدمے بنتے ہیں۔

سراج الحق کا کہنا تھا کہ اسی رفتار سے پھر واپس ہونے لگتے ہیں۔ ڈیل اور ڈھیل کی روش نے احتسابی عمل اور احتسابی اداروں کو مذاق بنا دیا ہے۔ یہ سلسلہ اب ختم ہونا چاہیے۔ قوم بلاتفریق حقیقی احتساب چاہتی ہے۔