منی لانڈرنگ ریفرنس کیس میں وزیراعظم شہبازشریف کو حاضری سے مستقل استثنیٰ مل گیا۔

تفصیلات کے مطابق لاہور کی احتساب عدالت کے جج قمر الزماں نے منی لانڈرنگ ریفرنس پر سماعت کی۔

سماعت کے دوران احتساب عدالت نے شہباز شریف کی مستقل حاضری معافی کی درخواست منظورکرتے ہوئے وزیرِاعظم شہبازشریف کو عدالت پیشی کے لیے نمائندہ مقرر کرنے کی اجازت دے دی۔

احتساب عدالت نے سابق وزیراعلٰی پنجاب حمزہ شہباز کی مستقل حاضری معافی کی درخواست پر نیب سے جواب طلب کر لیا اور حمزہ شہباز کی ایک روزہ حاضری معافی کی درخواست منظورکرلی۔

عدالت نے وزیراعظم شہبازشریف اور ان کے صاحبزادے حمزہ شہباز سمیت دیگر کے خلاف منی لانڈرنگ ریفرنس کی سماعت 25 اکتوبر تک ملتوی کردی۔

اسپیکرپنجاب اسمبلی کے الیکشن کے دوران بیلٹ پیپرچھیننے کا کیس

دوسری جانب سیشن عدالت لاہورمیں اسپیکر پنجاب اسمبلی کے الیکشن کے دوران بیلٹ پیپر چھیننے سے متعلق کیس میں مسلم لیگ ن کے رہنماؤں رانا مشہود، سیف الملوک کھوکھر، مرزا جاوید، رخسانہ کوثر، میاں عبدالرؤف عبوری ضمانتیں کنفرم ہو گئیں۔

عدالت نے مقدمہ کے ریکارڈ کا جائزہ لینے کے بعد ملزموں کی عبوری ضمانتیں کنفرم کیں۔

ایڈیشنل سیشن جج محمد جمیل نے لیگی ایم پی ایز کی عبوری ضمانت کی درخواستوں پر سماعت کی جبکہ لیگی رہنماؤں کی طرف سے رانا اسداللہ خان ایڈووکیٹ نے دلائل دیے۔

درخواست میں مؤقف اپنایا گیا کہ پولیس نے سیاسی بنیادوں پر لیگی ایم پی ایز کو مقدمہ میں نامزد کیا ہے۔ استدعا ہے کہ مقدمہ میں شامل تفتیش ہونا چاہتے ہیں مگر گرفتار کا خدشہ ہے، عبوری ضمانتیں منظور کی جائیں۔