پرویزالہٰی نے کہا ہے کہ عمران خان کی قیادت میں پاکستان ترقی کرے گا۔

تفصیلات کے مطابق وزیر اعلیٰ پنجاب چودھری پرویزالہٰی نے جلسہ عام سے خطاب کرتے ہوئے کہا کہ عمران خان کا ساتھ دیں، قائداعظم کے بعد یہ پہلا سچا لیڈر ہے، قوم کو عمران خان جیسا لیڈر ملا ہے شکر کریں اور اس کے لئے دعا کریں

انہوں نے کہا کہ عمران خان کی قیادت میں پاکستان ترقی کرے گا، پی ٹی آئی حکومت کے ساتھ ملکر عوام کی فلاح وبہبود کیلئے کام کریں گے اور دنیا بھر میں گرین پاسپورٹ کی عزت ہوگی۔

چودھری پرویزالہٰی کا کہنا تھا کہ  شہبازشریف کوشرم الشیخ جا کر بھی شرم نہیں آئی جبکہ شہبازشریف باہر جا کر بھی ملک کو بدنام کررہا ہے، شہبازشریف باہر جا کر کہتا ہے مجھے بھیک دو۔

ان کا یہ بھی کہنا تھا کہ شہبازشریف کو مانگنے کا ڈھنگ بھی نہیں آتا، مجھے ڈر تھا کہ شہبازشریف جا کر کہے گاکہ مجھے واپسی کا ٹکٹ بھی کرادو۔

وزیر اعلیٰ پنجاب نے کہا کہ شہبازشریف، نواز شریف اور ن لیگ نے کبھی عوام کے لئے کچھ نہیں کیا جبکہ انہوں نے تو عوام کی بہتری کا بھی کبھی نہیں سوچا۔

انہوں نے یہ بھی کہا کہ جو حکمران پیسے بنانے آتے ہیں ان کے کام میں برکت نہیں ہوتی، میں نے اپنے سابق دور میں خزانے میں 400ارب روپے سرپلس چھوڑے، اللہ تعالیٰ نے مجھے دینے والا بنایا ہے۔

وزیر اعلیٰ پنجاب کا کہنا تھا کہ پی ٹی آئی کے ساتھ ملکر دین کا کام کررہے ہیں، دین کی برکت سے کام آسان ہورہے ہیں جبکہ سہولتیں ملنے سے عوام کے گھرں میں خوشی آئے گی۔

چودھری پرویزالہٰی نے جہانیاں کی تمام کچی آبادی کو مالکانہ حقوق دینے کا اعلان کرتے ہوئے کہا کہ جہانیاں بار بار آتاجاتا رہوں گا، الیکشن سے پہلے پھر آکر پوچھوں گا کہ آپ کے کام ہوئے کہ نہیں۔

انہوں نے کہا کہ تحصیل ہیڈ کوارٹر ہسپتال کو 40 بیڈ سے 150بیڈز اپ گریڈ کررہے ہیں، تحصیل ہیڈ کواٹر ہسپتال جہانیاں میں بلڈ بینک اورلیبر روم بھی قائم کے جائیں گے۔

وزیر اعلیٰ پنجاب نے یہ بھی کہا کہ جہانیاں کے گرلز ڈگری کالج کو اپ گریڈ کیا جائے گا، جہانیاں میں نیا چلڈرن ہسپتال بنایا جائے گا جبکہ جہانیاں میں ٹراما سینٹر بھی بنایا جائے گا۔

چودھری پرویزالہٰی کا کہنا تھا کہ جہانیاں میں 1122ریسیکو موٹر بائیک سروس شروع کی جائے گی، ٹھٹھہ صادق آباد میں سیوریج سسٹم کے لئے 20کروڑ روپے دئیے جائیں گے جبکہ پی پی 210اور پی پی 209 میں سو، سوکلو میٹر پختہ سڑکیں بنائی جائیں گی۔

ان کا یہ بھی کہنا تھا کہ حلقہ این اے 147میں 50 فلٹریشن پلانٹ لگائے جائیں گے جبکہ ڈسٹرکٹ ہیڈ کوارٹر ہسپتال خانیوال میں ایم آر آئی مشین نصب کی جائے گی۔

وزیر اعلیٰ پنجاب چودھری پرویزالہٰی کا مزید کہنا تھا کہ جہاں سے غریبوں کی فلاح کا کام چھوڑا تھا وہی سے دوبارہ شروع کیا ہے، ساڑھے 12ایکڑ سے کم اراضی رکھنے والے ہر کسان کو مفت سولر پمپ دیں گے۔

جلسے سے ایم پی اے فیصل نیازی،پی ٹی آئی کے رہنما سید فخر امام، نوابزادہ عبدالرزاق خان نیازی، صوبائی مشیر ایاز خان نیازی، خالد جاوید وڑائچ او ردیگر نے بھی خطاب کیا۔