پی ٹی آئی کا لانگ مارچ اور احتجاج سے متعلق آئی جی اسلام آباد نے تفصیلی رپورٹ اسلام آباد ہائی کورٹ میں جمع کروا دی۔

آئی جی اسلام آباد کی جانب سے عدالت میں جمع کرائی گئی رپورٹ میں بتایا گیا کہ پی ٹی آئی25 مئی کو بھی اپنی گارنٹی کی خلاف ورزی کرچکی۔ علی امین گنڈا پور اور دیگر پی ٹی آئی رہنماؤں کے اشتعال انگیز بیانات بھی رپورٹ کا حصہ ہیں۔

رپورٹ میں یہ بھی کہا گیا کہ پی ٹی آئی کے ایک رہنما نے وزیر داخلہ کو جان کی دھمکی بھی دی۔ ویڈیوز موجود ہیں جن میں کارکنوں کو غلیلیں بھی دی جارہی ہیں اورشیخ رشید اور فیصل واوڈا کہہ چکے یہ خونی مارچ ہوگا۔

اسلام آباد پولیس کی جانب سے رپورٹ میں کہا گیا کہ خود عمران خان بھی تسلیم کر چکے ان کے کچھ لوگ مسلح ہیں۔ سپریم کورٹ واضح کر چکی اجتماع کی اجازت جمہوری حق کے طورپردی جاتی ہے۔ سپریم کورٹ کہہ چکی اجتماع قانونی حکومت کو ختم کرانے کیلئے نہیں ہوسکتا۔

رپورٹ میں یہ بھی کہا گیا کہ احتجاج سے ڈپلومیٹک موومنٹ بھی بند ہوتی ہے۔ ائیرپورٹ تک جانے والے راستوں پر وفاقی ایجنسیز کو اختیار دیا جائے۔

رپورٹ میں تجویز پیش کی گئی کہ پی ٹی آئی سے فنانشل گارنٹی بھی لی جا سکتی ہے کہ کوئی نقصان نہ ہو۔ پی ٹی آئی مطلوبہ ضمانت دے دے تو کنٹینرز بھی رکھنے کی ضرورت نہیں ہوگی اورعدالتی فیصلوں کیمطابق ہی پی ٹی آئی کو احتجاج کی اجازت دی جائے۔

آئی جی کی رپورٹ میں کہا گیا کہ مطلوبہ شرائط کیمطابق احتجاج ہوا تو سیکیورٹی دینے کو تیار ہیں۔

عمران خان کی جان کو لاحق خطرات سے متعلق تھریٹ الرٹس بھی رپورٹ کا حصہ ہیں۔