سماعت کے دوران منی لانڈرنگ کیس میں گواہ تجمل اسلام نے شہبازشریف اور حمزہ شہبازکوکلین چٹ دے دی۔

تفصیلات کے مطابق احتساب عدالت لاہورمیں وزیراعظم شہبازشریف خاندان کیخلاف منی لانڈرنگ ریفرنس کی سماعت ہوئی۔

امجد پرویز ایڈووکیٹ نے گواہ پر جرح مکمل کی، گواہ تجمل اسلام نےشہبازشریف، حمزہ شہبازکوکلین چٹ دیدی جس کے بعد احتساب عدالت کے جج نے حمزہ شہباز کی ایک روزہ حاضری معافی کی درخواست منظورکرلی اورحاضری سے مستقل استثنی کی درخواست پر نیب سے جواب طلب کرلیا۔

احتساب عدالت نے کیس کی مزید سماعت 15 دسمبر تک ملتوی کر دی۔

احتساب عدالت نمبر 9 کےجج قمرالزمان نے کیس پر سماعت کی۔ گواہ نے گڈ نیچر اور یونیٹاس سٹیل کمپنیوں کے بینک اکاؤنٹس کا ریکارڈ پیش کیا۔

گواہ تجمل اسلام نے عدالت کو بتایا کہ پرائیویٹ بینک میں آپریشن مینجر کے طور پر ذمہ داریاں انجام دے رہا ہوں، شہباز شریف، حمزہ کیخلاف منی لانڈرنگ کا عنصر سامنے نہیں آیا۔

گواہ نے عدالت کے سامنے بیان دیا جس میں کہا کہ گڈ نیچرکمپنی اور یونیٹاس سٹیل ملز سےملزمان کا تعلق نہیں۔ یونی ٹاس سٹیل اور گڈ نیچر کمپنی کے اکاؤنٹس منی لانڈرنگ کیلئے استعمال نہیں ہوئے۔

حمزہ شہباز احتساب عدالت میں پیش نہیں ہوئے، وکلاء نے حمزہ شہباز کی حاضری معافی کی درخواست جمع کراتے ہوئے مؤقف اپنایا کہ حمزہ شہباز کو کمر کی تکلیف ہے۔

حمزہ شہباز نے مستقل حاضری معافی کی درخواست بھی دائر کی جس میں کہا گیا کہ حمزہ شہباز پنجاب اسمبلی میں اپوزیشن لیڈر ہیں اور پارٹی کے عہدیدار ہیں سرکاری مصروفیات کے عدالت میں پیش نہیں ہوسکتے۔

حمزہ شہباز کی جانب سے یہ مؤقف بھی پیش کیا گیا کہ حمزہ شہباز کی جگہ حاضری کیلئے پلیڈر مقرر کرنے کو تیار ہیں۔

وزیر اعظم شہبازشریف کوعدالت نے مستقل حاضری سے استثنیٰ دے رکھا ہے۔ شہباز شریف کی جگہ حاضری کیلئے ان کے پلیڈر انوار حسین پیش ہوئے۔