آرمی چیف کی تعیناتی کے لیے جی ایچ کیو کی جانب سے بھیجی گئی سمری میں نیشنل ڈیفنس یونیورسٹی کے پریذیڈنٹ لیفٹیننٹ جنرل نعمان محمود کا نام بھی شامل ہے۔ 

لیفٹیننٹ جنرل نعمان محمود کا تعلق بلوچ رجمنٹ سے ہے جو پاک فوج میں بہت مضبوط کیرئیر کے حامل ہیں۔ انہیں خاص طور پر پاکستان کی مغربی سرحد کا ماہر مانا جاتا ہے۔

لیفٹیننٹ جنرل نعمان محمود نے بطور میجر جنرل شمالی وزیرستان میں ڈویژن کی کمان سنبھالی۔ 2019 میں لیفٹیننٹ جنرل بننے کے بعد انہیں جی ایچ کیو میں انسپکٹر جنرل آف کمیونی کیشن اینڈ انفارمیشن ٹیکنالوجی تعینات کیا گیا۔

لیفٹیننٹ جنرل نعمان محمود نے افغان سرحد کے ساتھ باڑ لگانے کے منصوبے کی نگرانی بھی کی۔ لیفٹیننٹ جنرل نعمان محمود اس وقت نیشنل ڈیفنس یونیورسٹی کے پریذیڈنٹ ہیں۔ وہ اس سے قبل پشاور کے کور کمانڈر بھی تعینات رہ چکے ہیں۔

لیفٹیننٹ جنرل نعمان محمود آئی ایس آئی میں بطور تجزیاتی ونگ ڈائریکٹر جنرل بھی خدمات انجام دے چکے ہیں۔ وہ کمانڈ اینڈ اسٹاف کالج کوئٹہ کے چیف انسٹرکٹر کے طور پر بھی وسیع تجربہ رکھتے ہیں۔

GHQ has forwarded the summary for Selection of CJCSC and COAS, containing names of 6 senior most Lt Gens to MoD.

— DG ISPR (@OfficialDGISPR) November 22, 2022

اس سے قبل آئی ایس پی آر کی جانب سے کی جانے والی ٹوئٹ میں کہا گیا کہ جنرل ہیڈکوارٹرز (جی ایچ کیو) نے آرمی چیف کی تعیناتی کیلئے سمری وزارت دفاع کو بھیجی تھی۔ سمری میں 6 سینیئر لیفٹیننٹ جنرلز کے نام شامل ہیں جو وزارت دفاع کو بھیجے گئے ہیں۔

بعد ازاں وزیر دفاع خواجہ آصف نے بھی تصدیق کی کہ آرمی چیف کی تعیناتی کے لیے سمری وزیراعظم آفس کو موصول ہوگئی ہے اور باقی مراحل بھی جلد طے ہوجائیں گے۔

وزیراعظم ہاؤس کو موصول ہونے والی سمری میں سب سے پہلا نام لیفٹیننٹ جنرل عاصم منیر کا ہے اور دوسرا نام لیفٹیننٹ جنرل ساحر شمشاد، تیسرا نام لیفٹیننٹ جنرل اظہر عباس، چوتھا لیفٹیننٹ جنرل نعمان محمود، پانچواں لیفٹیننٹ جنرل فیض حمید اور چھٹا نام لیفٹیننٹ جنرل محمد عامر کا ہے۔