وزیراعلیٰ سندھ کے مشیراعجاز جاکھرانی کی ضمانت قبل از گرفتاری کی درخواست پرسماعت جنوری تک ملتوی کر دی گئی۔

تفصیلات کے مطابق سپریم کورٹ میں وزیراعلیٰ سندھ کے مشیر اعجاز جاکھرانی کی ضمانت قبل از گرفتاری کی درخواست پرسماعت ہوئی۔

چیف جسٹس پاکستان جسٹس عمرعطابندیال کی سربراہی میں چار رکنی بنچ نے سماعت کی۔

جسٹس اطہر من اللہ اور جسٹس حسن اظہر رضوی بھی بنچ کا حصہ تھے۔

سماعت کے دوران سینئر وکیل منیر اے ملک نے جسٹس اطہرمن اللہ اور جسٹس حسن اظہر رضوی کو مبارکباد دیتے ہوئے کہا کہ  میرے لیے باعثِ فخر ہے کہ معزز ججز صاحبان کے سامنے پیش ہو رہا ہوں۔

وکیل اعجاز جاکھرانی نے کہا کہ اس مقدمے میں اضافی دستاویزات جمع کروا دیے ہیں۔

چیف جسٹس پاکستان نے وکیل سے پوچھا کہ نیب کا اس مقدمے میں کیا مؤقف ہے؟ ملزم ضمانت قبل از گرفتاری مانگ رہا ہے۔ ملزم کے مطابق اس نے عہدے پر رہتے ہوئے کوئی رقم وصول نہیں کی۔

وکیل منیراے ملک نے مؤقف پیش کیا ہم نے اس سے متعلق کچھ دستاویزات عدالت میں جمع کروائے ہیں۔

جسٹس اطہرمن اللہ نے پراسیکیوٹر نیب سے مکالمہ کرتے ہوئے کہا کہ میں ایک سوال پوچھنا چاہوں گا، نیب قانون کی کون سی شق کے تحت ریفرنس دائر ہونے کے بعد چیئرمین نیب گرفتاری کا کہہ سکتے ہیں؟

جسٹس اطہر من اللہ نے پوچھا کہ چیئرمین نیب کے پاس ریفرنس دائر ہونے کے بعد گرفتاری کا کوئی اختیار نہیں ہے۔

چیف جسٹس پاکستان نے کہا کہ میرے قابل دوست نے ایک مناسب سوال اٹھایا ہے۔ آپ ہمیں اس نقطے پر مطمئن کریں۔ ہمارے لیے مشکل یہ بھی ہے کہ نیب ترامیم ہمارے سامنے چیلنج ہیں۔

عدالت نے ملزم کے وکیل کی استدعا پر سماعت جنوری تک ملتوی کر دی۔