محمود خان نے کہا ہے کہ امپورٹڈ ٹولے کی ناقص پالیسیوں نے عام آدمی کی زندگی اجیرن کر دی ہے۔

 تفصیلات کے مطابق آزاد حیثیت سے منتخب تحصیل چیئرمین حویلیاں عاطف منصف خان جدون کی پاکستان تحریک انصاف میں شمولیت کے موقع پر وزیراعلیٰ خیبرپختونخوا محمود خان نے کہا کہ  پی ٹی آئی حقیقی معنوں میں عوام کی نمائندہ اور پسندیدہ سیاسی جماعت ہے۔

محمود خان نے کہا کہ پی ٹی آئی میں سیاسی رہنماوں ، کارکنوں اور عوام کی شمولیت کا رجحان بڑھتا جارہا ہے جو پارٹی لیڈر شپ، چیئرمین عمران خان کے وژن اور صوبائی حکومت کی عوام دوست پالیسیوں پر عوام کے غیر متزلزل اعتماد کا اظہار ہے۔

وزیراعلیٰ خیبرپختونخوا کا کہنا تھا کہ تحریک انصاف ہی واحد جماعت ہے جس کی مقبولیت میں روز بروز اضافہ ہو رہا ہے جس سے امپورٹڈ حکمران بوکھلاہٹ کا شکار ہیں اور اس مقبولیت کو دبانے کے لیے اوچھے ہتھکنڈے استعمال کرنے پر اتر آئے ہیں۔

ان کا یہ بھی کہنا تھا کہ پی ٹی آئی ہی واحد سیاسی جماعت ہے جو وفاق کی علامت ہے اور اس کی جڑیں پختونخوا سمیت ملک بھر میں پھیلی ہوئی ہیں جو وقت کے ساتھ ساتھ مزید مضبوط ہو رہی ہیں۔

محمود خان نے کہا کہ رجیم چینج سازش کے تحت ملک پر مسلط امپورٹڈ ٹولہ جلد ایکسپورٹ ہونے جا رہا ہے ،اس ناہل ٹولے کی ناقص پالیسیوں نے عام آدمی کی زندگی اجیرن کر دی ہے۔

وزیراعلیٰ خیبرپختونخوا محمود خان نےمزید کہا کہ 14 جماعتیں مل کر بھی عام آدمی کی بہتری کے لیے کچھ نہیں کر پا رہے اور ملک میں دن بدن مہنگائی کی شرح میں اضافہ ہوتا جا رہا ہے۔

شمولیتی تقریب میں قائم مقام گورنر و اسپیکر صوبائی اسمبلی مشتاق احمد غنی، صوبائی وزیر ارشد ایوب اور سابق صوبائی وزیر قلندر خان لودھی بھی شریک تھے۔