وزیراعلیٰ پنجاب چوہدری پرویز الہیٰ کا کہنا ہے کہ ملک سے دہشت گردی کے خاتمے کا کریڈٹ سابق آرمی چیف جنرل قمرجاوید باجوہ کو جاتا ہے۔

وزیراعلیٰ پنجاب چوہدری پرویزالٰہی نے ایک ویڈیو پیغام جاری کیا ہے جس میں انہوں نے کہا کہ  سابق آرمی چیف قمر جاوید باجوہ کا پریڈ تاریخ میں یاد رکھا جائے گا، قمر جاوید باجوہ کا دورلوگوں کے دلوں میں بھی یاد رہے گا۔

چوہدری پرویز الہیٰ کا کہنا تھا کہ آپریشن ردالفساد میں سابق آرمی چیف قمر جاوید باجوہ کے شاندار کردارکی دنیا معترف ہے، ملک سے دہشت گردی کے خاتمے کا کریڈٹ قمرجاوید باجوہ کو جاتا ہے، انہوں نے  سوات، قبائلی علاقوں، وزیرستان میں دہشت گردی کے خاتمے کیلئے بہت محنت کی اوردہشت گردوں کو ختم کیا۔

وزیراعلیٰ پنجاب نے کہا کہ الحمداللہ آج خیبرپختونخواہ سمیت تمام علاقوں میں امن ہے اورلوگ پرسکون ہیں، جب زلزلہ آیا تواس وقت بھی سابق آرمی چیف قمر جاوید باجوہ کی قیادت میں پاک فوج نے بہت کام کیا، سیلاب میں بھی آرمی پنجاب کے متاثرہ علاقوں سمیت ہر جگہ بروقت پہنچی۔

چوہدری پرویز الہیٰ کا کہنا تھا کہ سندھ میں سیلاب کے دوران پاک فوج کے علاوہ کسی نے کام نہیں کیا،  خیبر پختونخوامیں بدترین سیلاب آیااورقمر جاوید باجوہ خود وہاں پہنچے، جنرل (ر) قمر جاوید باجوہ کی سماجی و دینی خدمات بے شمار ہیں۔

وزیراعلیٰ پنجاب نے کہا کہ  سعودی عرب نے دنیا کی سب بڑی تبلیغی جماعت پر غلط فہمی کی بناپرپابندی لگا دی تو سابق آرمی چیف قمر جاویدباجوہ نے پابندی ہٹوانے میں اہم کردار ادا کیا، تبلغی جماعت کے اجتماعات میں قمر جاوید باجوہ کی درازی عمر اورپالیسیوں کے تسلسل کیلئے سب سے زیادہ دعائیں کی گئیں۔

چوہدری پرویز الہیٰ کا کہنا تھا کہ قمر جاوید باجوہ کا کرداردین کیلئے بھی اچھا ہے، ملک کیلئے بھی اچھاہے اورآئندہ آنے والی نسلوں کے بھی اچھا ہے، میں سمجھتا ہوں کہ لوگ آتے جاتے ہیں لیکن ان کے کام ہمیشہ یاد رہتے ہیں، انہوں نے ملک کی حفاظت،سلامتی اوربہتری کیلئے جتنے کام کیے وہ رہتی دنیا تک لوگ یاد رکھیں گے۔

وزیراعلیٰ پنجاب کا کہنا تھا کہ میں نئے آرمی چیف سید عاصم منیر کو بھی مبارکباد پیش کرتا ہوں، ہمیں بہتری کی امید ہے کہ جنرل سید عاصم منیر کا بہت تجربہ ہے اورانہوں نے بہت کام کیا ہے، مجھے بھی 8 سے 10 ماہ ان کے ساتھ کام کرنے کا موقع ملا تھا۔

انہوں نے مزید کہا کہ انشاء اللہ جنرل سید عاصم منیر بہترین سپہ سالار ثابت ہوں گے، ہماری سب کی دعائیں نئے آرمی چیف کے ساتھ ہیں،  ہندوستان یہ نہ سمجھے کہ ہم لاوارث ہوگئے ہیں،یہ کبھی نہیں ہوسکتا، پاک فوج دنیا کا بہترین ادارہ ہے اورپورا ایک نظام موجود ہے۔

چوہدری پرویز الہیٰ نے کہا کہ دنیا کی سب سے بہترین فوج پاکستان کی فوج ہے، پاک فوج کی ہر جگہ پرنظرہوتی ہے،خصوصاًفارن پالیسی اوردیگر امور بھی ان کی نظر میں ہوتے ہیں،  اللہ تعالیٰ کی مددسے انشاء اللہ نئے آرمی چیف سید عاصم منیر پاکستان پرکوئی آنچ نہیں آنے دیں گے۔