حقیقی آزادی لانگ مارچ کل سرگودھا پہنچے گا، تحریک انصاف کے جنرل سیکرٹری اسد عمر لانگ مارچ کی قیادت کرینگے۔

تفصیلات کے مطابق سرگودھا میں لانگ مارچ کے استقبال کیلئے تیاریاں زور و شور سے جاری ہیں، تحریک انصاف کا حقیقی لانگ مارچ مرکزی جنرل سیکرٹری اسد عمر کی قیادت میں کل بدھ کے روز سرگودھا پہنچے گا۔

کوٹ مومن انٹرچینج سے قافلے کا استقبال کیا جائے گا، سرگودھا شہر پہنچنے تک 7 مختلف جگہ پر استقبالیہ کیمپ لگا دئیے گئے ہیں جہاں تحریک انصاف کی قیادت اور ایم پی ایز لانگ مارچ کے شرکاء کا استقبال کرینگے۔

خیام چوک میں پی ٹی آئی کے جنرل سیکرٹری اسد عمر خطاب کرینگے جبکہ اسکے بعد چیئرمین تحریک انصاف کا خطاب بڑی اسکرین پر دکھایا جائے گا۔

جلسہ گاہ میں 10 ہزار سے زائد کرسیاں لگائی جائیں گی جبکہ اسٹیج کی تیاری جاری ہے۔

صوبائی وزیر عنصر مجید نیازی اور ایم پی اے سائرہ رضا کا کہنا تھا کہ سرگودھا کے شاہین لانگ مارچ کا تاریخی استقبال کرینگے، اب سرگودھا کے عوام نے غلامی کی زنجیریں توڑ دی ہیں جس کی واضح مثال عمران خان کے جلسہ سرگودھا کے موقع پر سب کے سامنے ہے،عمران خان نے اپنا خون بہا کر اس حقیقی آزادی مارچ کو سینچا ہے۔

اس موقع پر تحریک انصاف ضلع سرگودھا کے صدر اسامہ غیاث میلہ نے کہا کہ عمران خان کی حقیقی آزادی کی جنگ میں سرگودھا کے شاہین صف اول پر ہونگے اور ہم امپورٹڈ حکومت کو بھگا کرہی اسلام آباد سے واپس آئینگے۔

ڈاکٹر نادیہ عزیز کا کہنا تھا کہ سرگودھا لانگ مارچ میں خواتین کی بڑی تعداد شرکت کرکے حکومت کو بتائے گی کہ ہم نہ ڈرے ہیں اور نہ ڈریں گے۔

تحریک انصاف کے رہنماؤں کا کہنا تھا کہ حقیقی آزادی لانگ مارچ میں سرگودھا سے ہزاروں کی تعداد میں عوام اور کارکن شرکت کرینگے اور پیغام دینگے کہ وہ غلامی کی زندگی نہیں جینا چاہتے۔