امریکہ کی معروف الیکٹرک کار بنانے والی کمپنی ٹیسلا کی الیکٹرک کار نے خود کار نظام کے احکامات ہوا میں اڑا دیئے اور دو افراد کو روند ڈالا۔

غیر ملکی میڈیا کی رپورٹس کے مطابق پانچ نومبر کو ٹیسلا الیکٹرک کار کی خرابی اور پاگل پن کی حد تک تیز رفتاری کی تصدیق 12 نومبر کو ویڈیو کے ذریعہ ہوگئی۔

غیر ملکی میڈیا کا کہنا ہے کہ ویڈیو سامنے نہ آتی تو اس بات پر یقین کرنا مشکل ہوجاتا کہ حادثہ ٹیسلا کار کی خرابی کے باعث پیش آیا ہے۔

یہ واقعہ جنوبی چین کے صوبہ گوانگ ڈونگ میں چاؤ ڑو شہر میں پیش آیا جو اپنی بندرگاہ کے حوالے سے مشہور ہے۔

چاؤ ڑو میں حادثہ اس طرح پیش آیا کہ کار میں اچانک خرابی آگئی اور وہ اتنی تیز ہوگئی کہ ڈرائیور اس کو کنٹرول میں نہ رکھ سکا اور کار نے دو افراد کو روند کر جاں بحق اور تین کو زخمی کردیا۔

ٹیسلا کار ماڈل وائے 2022 کی تھی یہ ماڈل مکمل الیکٹرک چارج کے ساتھ 480 کلومیٹر سے زیادہ فاصلہ طے کرنے کی صلاحیت رکھتی ہے۔

مشرق وسطیٰ سے تعلق رکھنے والی ایک ویب سائٹ کے مطابق کار کو ایک گلی کے کونے میں روکنے کا پروگرام دیا گیا تھا جس کی بنا پر کار کی رفتار آہستہ ہوئی لیکن ویڈیو میں دکھائی دے رہا ہے رکنے کی جگہ کے قریب پہنچ کر کار رکی نہیں بلکہ بائیں طرف آہستہ ہونے کے بعد دوبارہ چل پڑی اور گزرنے والی گلیوں میں اچانک اس کی رفتار تیز ہوگئی۔

ٹیسلا کار کی اس دوران کئی کیمرے نگرانی کر رہے تھے۔ دو افراد اس کے پہیوں سے ٹکراکر ہلاک ہوئے اور تین زخمی ہو گئے۔

ایک رپورٹ کے مطابق ہلاک ہونے والے دونوں موٹرسائیکل سوار تھے۔ ان کو ٹکر کا منظر بھی ویڈیو میں دیکھا جا سکتا ہے، ویڈیو میں ایک ہائی سکول کی طالبہ کو کار سے بچنے کیلئے بھاگتے ہوئے بھی دیکھا جا سکتا ہے۔ ٹریفک پولیس کے مطابق ابھی تک حادثے کی تکنیکی وجہ کا تعین نہیں ہو سکا ہے۔

واضح رہے کہ ایک 55 سالہ شخص کو بھی بریک پیڈل میں دشواری کا سامنا کرنا پڑا جب وہ فیملی سٹور کے سامنے رک رہے تھے۔

دُنیا کے امیر ترین شخص ایلون مسک کی ملکیت کمپنی ’’ ٹیسلا‘‘ نے اپنے ایک پیغام میں کہا کہ چینی سٹی پولیس فی الحال سچائی کا تعین کرنے کے لیے تیسرے فریق سے اس واقعہ کی وجہ تلاش کرا رہی ہے۔ اس حوالے  سے ہم ضروری مدد فراہم کریں گے۔

ٹیسلا کمپنی نے مزید کہا کہ صارفین افواہوں پر دھیان نہ دیں۔

ٹیسلا کے ترجمان کا کہنا تھا کہ ویڈیوز سے ظاہر ہوتا ہے کہ گاڑی کی رفتار کے دوران بریک لائٹس نظر نہیں آرہی تھیں۔ اس کا ڈیٹا مسائل کی نشاندہی کر رہا ہے اور یہ بھی معلوم ہو رہا ہے کہ ڈرائیور نے گاڑی کے پورے سفر میں بریک نہیں لگائی۔ اس سے ذمہ داری ڈرائیور پر بھی آ سکتی ہے۔

یاد رہے چین میں ٹیسلا پر ناقص بریکوں کے پہلے بھی الزامات لگتے رہے ہیں اور چین الیکٹرک کاروں کے لئے کمپنی کی دوسری سب سے بڑی مارکیٹ ہے۔