بھارت کے سابق کرکٹر اور کمنٹیٹر نے اپنے ایک ویڈیو بیان میں کہا کہ ویرات کوہلی کی فیلڈنگ فیک فیلڈنگ تھی جو کہ غلط عمل تھا۔

تفصیلات کے مطابق بھارت کے سابق کرکٹر اور کمنٹیٹر  آکاش چوپڑا نے بنگلادیش کے خلاف ویرات کوہلی کی فیلڈنگ کو فیک فیلڈنگ قرار دیتے ہوئے کہا کہ اس عمل نے کرکٹ کی ساکھ کو متاثر کیا ہے۔

واضح رہے کہ بنگلہ دیش اور بھارت کے درمیان ٹی ٹوئنٹی ورلڈ کپ کے اہم میچ میں بھارت کے فیلڈر ویرات کوہلی نے ہاتھ کے اشارے سے یہ ظاہر کیا کہ ان کے ہاتھ میں بال ہے اور وہ تھرو کر رہے ہیں۔

یہ واقعہ بھارت اور بنگلادیش کے اہم میچ کے دوران پیش آیا جب  بنگلادیش کی اننگز کے 7 ویں اوور میں اکسر پٹیل کی گیند پر بنگلادیشی بیٹر لٹن داس نے ڈیپ آف سائیڈ فیلڈ کی جانب شاٹ کھیلا اور گیند وہاں موجود فیلڈر ارشدیپ سنگھ کے پاس گئی۔

 بھارتی فیلڈر ارشدیپ نے جیسے ہی تھرو وکٹ کیپر کی جانب پھینکی تو اچانک پوائنٹ  پوائنٹ پوزیشن پر کھڑے ویرات کوہلی نے بیٹسمین کو دھوکہ دینے کے لیے  ایسا ظاہر کیا کہ گیند ان کے پاس آئی اور انہوں نے خالی ہی ہاتھوں سے بولنگ اینڈ کی جانب فیک تھرو کی۔

واضح رہے کہ ویرات کوہلی کی اس دھوکہ دہی کا اس دوران نہ ہی آن فیلڈ امپائرز نے نوٹس لیا اور نہ ہی بنگلادیشی بیٹسمینوں نے کوئی شکایت کی۔

ماہرین کا کہنا ہے کہ شاید بنگلہ دیش کے بیٹسمینوں کو دھوکہ دہی کے اس قانون کا علم نہیں تھا۔

بھارت کے سابق کھلاڑی اور معروف کمنٹیٹر آکاش چوپڑا نے ویرات کوہلی کی اس دھوکہ دہی پر ببانگ دہل کہا کہ یہ فیک فیلڈنگ تھی جو نامناسب تھی۔

آکاش چوپڑا کا کہنا تھا کہ ویرات کوہلی اس فیک فیلڈنگ کی وجہ سے دھوکہ دہی کے مرتکب ہوئے تھے اور اس کے اس عمل نے کرکٹ کی ساکھ کو متاثر کیا ہے۔

آکاش چوپڑا نے مزید کہا کہ ویرات کوہلی کی اس فیک فیلڈنگ کا جرمانہ پانچ رنز ہے، اگر امپائر کوہلی کے اس عمل کو دیکھ لیتے تو 5 رنز کا جرمانہ بھارتی ٹیم کے لیے کافی نقصان دہ ثابت ہو سکتا تھا، کیونکہ بنگلہ دیش کے خلاف بھارت نے میچ بھی صرف 5 رنز سے ہی جیتا تھا۔