کوئٹہ اینٹی کرپشن نے سابق ایس ایچ او بروری تھانے عتیق دستی کے وارنٹ گرفتاری جاری کردیے۔

تفصیلات کے مطابق اینٹی کرپشن ونگ نے 25 اکتوبر کو تھانہ بروری کے پولیس اہلکار، ایس ایچ او کے ڈرائیور اور ایک ایجنٹ کو 2 لاکھ رشوت لیتے ہوئے رنگے ہاتھوں گرفتار کیا تھا۔

اینٹی کرپشن ذرائع کے مطابق 25 اکتوبر کو ڈائریکٹر جنرل اینٹی کرپشن سہیل انور ہاشمی کو بلوچستان کے علاقے مسلم باغ کے رہائشی محمد طاہر نے درخواست دی تھی کہ میرا بھائی سعید احمد علاج کیلئے کوئٹہ آیا تھا جسے بروری تھانے کے اہلکاروں نے حراست میں لے لیا۔

رہائی کیلئے 2 لاکھ روپے طلب کیے جس پر ڈائریکٹر جنرل نے اسسٹنٹ ڈائریکٹر اینٹی کرپشن وحید بگٹی کی سربراہی میں ٹیم تشکیل دی جس نے جوڈیشل مجسٹریٹ کے ہمراہ اسپنی روڈ پر کارروائی کرتے ہوئے تھانہ بروری کے ہیڈ کانسٹیبل محمد علی ایس ایچ او کے ڈرائیور محمد ناصر اور ان کے ایک سہولت کار امیر جان کو 2 لاکھ روپے وصول کر تے ہوئے رنگے ہاتھوں گرفتار کر لیا۔

دوران تفتیش ڈرائیور محمد ناصر نے رشوت وصول کرنے کا اعتراف کرتے ہوئے بیان دیا ہے کہ اسے سابق ایس ایچ او بروری عتیق دستی نے سعید احمد کے بھائی سے 2 لاکھ روپے وصول کرنے کا کہا تھا۔

ملزم کے اعتراف کے بعد ڈائریکٹر جنرل اینٹی کرپشن نے سابق ایس ایچ او بروری تھانہ کے وارنٹ گرفتاری جاری کردیے اور اُن کی گرفتاری کیلئے ٹیم تشکیل دیدی گئی۔

یاد رہے کہ انسپکٹر جنرل آف پولیس بلوچستان عبدالخالق شیخ نے پولیس کی جانب سے رشوت وصول کرنے کی ویڈیو سوشل میڈ یا پر وائرل ہونے پر ایس ایچ او بروری تھانہ کو معطل کیا تھا۔