دنیائے کھیل کے سب سے زیادہ پسندیدہ کھیل فٹ بال کے عالمی ایونٹ کو دیکھنے کے لیے چند شائقین نے مہنگے داموں گھر خرید لیا۔

تفصیلات کے مطابق 2022 کا فیفا ورلڈ کپ قطر میں آج شروع ہو رہا ہے، اور فٹ بال کے دیوانے اس کھیل کو خوش آمدید کہنے کے لیے تیار ہیں۔

بھارتی میڈیا کی رپورٹس کے مطابق اپنے پسندیدہ کھلاڑیوں کے کٹ آؤٹ اور پوسٹرز سے سڑکوں کو سجانے سے لے کر پہلے سے مہنگے ٹکٹ خریدنے تک اور فٹ بال کے شائقین کھیل سے اپنی محبت کے اظہار کے لیے ہر طرح کے پاگل پن کرتے ہیں۔

ایسی ہی ایک کہانی بھارتی ریاست کیرالہ سے سامنے آئی ہے جہاں کے باشندے کھیل سے بے لگام محبت رکھتے ہیں۔

بھارتی خبر رساں ادارے کی ایک رپورٹ کے مطابق کیرالہ کے کوچی ضلع کے منڈکاموگل گاؤں کے 17 رہائشیوں نے 62 لاکھ روپے میں ایک گھر مشترکہ طور پر خریدا ہے، تاکہ وہ ایک مشترکہ جگہ پر ایک ساتھ فیفا کے میچ دیکھ سکیں۔

فٹبال کے متوالے ان دوستوں نے نئے خریدے گئے گھر کو ورلڈ کپ میں حصہ لینے والی 32 ٹیموں کے جھنڈوں کے ساتھ فٹبال اسٹار لیونل میسی اور کرسٹیانو رونالڈو کی تصویروں سے بھی سجایا ہے۔

گھر میں ایک بڑی سکرین والا ٹیلی ویژن لگایا گیا ہے تاکہ سب مل کر میچ دیکھ سکیں۔

اس مشترکہ گھر کے ایک مالک شیفیر پی اے نے کہا کہ ہم نے فیفا ورلڈ کپ 2022 میں کچھ خاص کرنے کا ارادہ کیا تھا، اسی لیے ہم 17 دوستوں نے ملک کر ایک گھر خریدا تاکہ ایک ساتھ میچ دیکھ سکیں۔

شیفیر نے کہا کہ ہم نے اس گھر کو فیفا ورلڈ کپ کی ٹیموں کے جھنڈوں سے سجایا ہے اور ایک بڑی ٹی وی اسکرین بھی لگائی ہے تاکہ ہم یہاں آرام اور سکون کے ساتھ میچز دیکھ سکیں۔

گھر خریدنے سے پہلے اس 17 رکنی گروپ نے فٹ بال کے کھیل ایک ساتھ دیکھنے کی ایک انوکھی روایت قائم کی تھی اور وہ گزشتہ 20 سالوں سے فیفا ورلڈ کپ اکٹھے دیکھتے آ رہے ہیں لیکن اس مرتبہ انہوں نے بالآخر گھر میں جمع ہونا جاری رکھنے کے لیے جائیداد خریدنے کا فیصلہ کیا۔

“خریداروں کا کہنا تھا کہ یہ گھر سماجی خدمات، ہنگامی خدمات اور کھیلوں کے مقابلوں کا مقام بن جائے گا۔

الخور کے البیت اسٹیڈیم میں پہلے میچ میں ایکواڈور کی ٹیم میزبان ٹیم قطر سے ٹکرائے گی۔ یہ پہلا موقع ہو گا کہ مشرق وسطیٰ کا کوئی ملک فیفا ورلڈ کپ کی میزبانی کر رہا ہے۔