نائجیریا کے جنوب مشرقی بندرگاہی شہر کالابار میں ڈرائیور کے کار پر ’کنٹرول کھونے‘ اور ہجوم سے ٹکرانے سے 7 افراد ہلاک ہو گئے۔

غیر ملکی میڈیا کے مطابق ہائی وے سیکیورٹی کے ایک اہلکار کا کہنا ہے کہ جنوب مشرقی نائجیریا کے کالابار میں ایک مشہور فیسٹیول کے موقع پر جمع شہریوں پر ایک کار کے چڑھنے سے کم از کم سات افراد ہلاک اور دو درجن سے زائد زخمی ہو گئے ہیں۔

فیڈرل روڈ سیفٹی کور کے مقامی کمانڈر میکانو حسن نے ایک بیان میں کہا کہ ایک ٹویوٹا کیمری کنٹرول کھو بیٹھی اور کیمرون کی سرحد کے قریب بندرگاہی شہر میں تماشائیوں کے ہجوم سے ٹکرا گئی۔

میکانو حسن کے بیان کے مطابق اس حادثے میں سات افراد ہلاک اور 29 زخمی ہوئے، جن میں سے کچھ کی حالت نازک ہے، گاڑی کا ڈرائیور بچ گیا لیکن زخمی ہوگیا۔

نائجیریا کے مقامی میڈیا نے کہا کہ متعدد افراد ہلاک ہوئے ہیں دوسری جانب برطانوی میڈیا نے مرنے والوں کی تعداد 14 بتائی ہے۔

مقامی میڈیا کے مطابق دو سال کی کورونا پابندیوں کے بعد یہ تقریب منعقد کی گئی تھی جس میں بڑی تعداد میں مقامی زائرین اور غیر ملکی سیاحوں شریک ہوتے ہیں۔

غیر ملکی میڈیا نے پولیس کا حوالہ دیتے ہوئے کہا کہ ڈرائیور نشے میں تھا اور وہ گاڑی پر کنٹرول کھو بیٹھا۔

یہ واقعہ اس وقت پیش آیا جب ہجوم بوگوبیری ضلع میں ایک مسجد کے سامنے موٹر سائیکل پریڈ دیکھ رہے تھے۔

واضح رہے کہ دریائے کراس کی ریاست کا دارالحکومت کیلابار ہر دسمبر میں مغربی افریقہ کے سب سے مشہور کارنیوالوں میں سے ایک کا انعقاد کرتا ہے۔

بائیکرز شو اس ایونٹ کی اہم جھلکیوں میں سے ایک ہے، جسے افریقہ کی سب سے بڑی اسٹریٹ پارٹیوں میں سے ایک کہا جاتا ہے۔

نائجیریا کی سرکاری ویب سائٹ کا کہنا ہے کہ ایونٹ میں ہر سال تقریباً 20 لاکھ لوگ آتے ہیں۔