فواد چوہدری نے کہا ہے کہ پاکستان پر مزید تجربات نہ کیے جائیں۔

تفصیلات کے مطابق پاکستان تحریک انصاف کے رہنما فواد چوہدری نے میڈیا سے گفتگو کرتے ہوئے کہا کہ اسحاق ڈار کو مبارکباد دینا چاہتا ہوں،انہوں نے قانونی جنگ جیتی ہے، جس طرح اسحاق ڈار کیس جیتے اس پر ہر پاکستانی شرمندہ ہے، اسحاق ڈار کی کامیابی پاکستان کی ناکامی ہے۔

فواد چوہدری نے کہا کہ ہم اجتماعی استعفے دینا چاہتے ہیں جبکہ حکومت بنانے اور اسمبلی تحلیل کرنے کا حق ہمارا ہے ، اعتماد کا ووٹ لیتے ہی ہم اسمبلی کی تحلیل کی طرف جائیں گے۔

ان کا کہنا تھا کہ اسپیکر نے جو 11 استعفے منظور کئے کیا انہیں بلایا گیا تھا؟11استعفے ان نشستوں کے منظور ہوئے جہاں پی ٹی آئی کمزور تھی،11استعفے انہوں نے منظور کرلیے تو باقی نہیں ہوسکتے؟ سپریم کورٹ ہی ہمیں بتائے کہ اس مسئلے کا کیا حل ہے؟ استعفے اجتماعی ہی ہوں گے۔

پی ٹی آئی کے رہنما کا یہ بھی کہنا تھا کہ پنجاب اسمبلی میں اس وقت تحریک انصاف کے 190 ممبرز ہیں، اسپیکر قومی اسمبلی نے استعفے منظور نہیں کیے اب سپریم کورٹ جائیں گے۔

فواد چوہدری نے کہا کہ پارلیمانی پارٹی کا اجلاس جنوری کے پہلے ہفتے میں بلایا ہے جبکہ پنجاب میں ارکان کوخریدنے کی کوشش کی جارہی ہے، کسی کو لندن، کسی کو عمرے پر بھیجنے کی پیشکش کی جا رہی ہے۔

رہنما پی ٹی آئی نے یہ بھی کہا کہ ملک کا آئین بحال کر کے انتخابات کی طرف بڑھا جائے جبکہ حکومت چاہتی ہےالیکشن نہ ہوں ٹیکنوکریٹ حکومت آجائے لیکن اگر ٹیکنوکریٹ آئے تو وہ معاملات کو نہیں سنبھال سکیں گے۔

فواد چوہدری کا کہنا تھا کہ ملکی بحران کا واحد حل شفاف الیکشن ہے، انتخابات پر فوکس کریں اور  پی ڈی ایم عوام کے سامنے جانے کی جرات کرے۔

پی ٹی آئی کے رہنما فواد چوہدری کا مزید کہنا تھا کہ تحریک انصاف نے مہنگائی کے خلاف کل سے احتجاج کااعلان کیا ہے، عمران خان 3 ہفتے بعد تحریک کولیڈکریں گے۔