آرمی چیف جنرل عاصم منیر کا کہنا ہے کہ پاکستان انتہائی نازک موڑسے گزر رہا ہے اور ملک کو اقتصادی  و دہشت گردی کے چیلنجز درپیش ہیں جس سے نمٹنے کے لیے قومی اتفاق رائے ضروری ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے پاکستان نیول اکیڈمی کراچی میں پاسنگ آوٹ پریڈ میں بطور مہمان خصوصی شرکت کی۔ نیول اکیڈمی کراچی آمد پر نیول چیف امجد خان نیازی نے ان کا استقبال کیا-

پاک فوج کے سربراہ نے نمایاں کارکردگی کا مظاہرہ کرنے والے کیڈٹس میں انعامات تقسیم کئے ۔ لیفٹیننٹ کاشف عبدالقیوم کو مجموعی بہترین کارکردگی پر قائداعظم گولڈ میڈل سے نوازا گیا جب کہ مڈشپ مین نوفیل ملک کو مجموعی بہترین کارکردگی پر اعزازی شمشیر سے نوازا گیا-

یہ بھی پڑھیں؛ دہشتگردی کے خلاف جنگ جاری رہے گی، آرمی چیف

پاسنگ آوٹ پریڈ سے خطاب کرتے ہوئے پاک فوج کے سربراہ کا کہنا تھا کہ پاکستان مشکل صورتحال سے گزررہا ہے، قومی ترقی کے لئے تمام اسٹیک ہولڈرز میں اتفاق رائے ضروری ہے۔

جنرل سید عاصم منیر نے کہا کہ میری ٹائم صورتحال مسلسل تبدیل ہورہی ہے اور مستقبل میں نیوی کا کردار انتہائی اہمیت کا حامل ہوگا۔

علاوہ ازیں آرمی چیف جنرل عاصم منیر نے ملیر گیریژن کراچی کا بھی دورہ کیا۔ آرمی چیف جنرل عاصم منیر نے یادگار شہدا پر حاضری دیکر فاتحہ خوانی کی اور پھول چڑھائے۔ آرمی چیف جنرل سید عاصم کی آمد پر کور کمانڈر کراچی لیفٹیننٹ جنرل بابر افتخار نے استقبال کیا۔

آرمی چیف جنرل عاصم منیر نے ملیر گیریژن میں کراچی کور اور رینجرز کے افسران سے خطاب کرتے ہوئے جدید جنگی رجحانات اور تقاضوں پر توجہ مرکوز کرنے پر زور دیا۔

آرمی چیف جنرل عاصم منیر نے کہا ہے کہ معیشت اور دہشت گردی جیسے قومی چیلنجز سے نمٹنے کے لئے قومی اتفاق رائے ضروری ہے۔